Óskemende koronavirýs juqtyrǵan azamatshanyń júregin dárigerler 2 ret qaita soqtyrǵanymen, úshinshisinde qaitys boldy. Bul týraly búgin «Habar 24» telearnasynan Shyǵys Qazaqstan oblystyq Densaýlyq saqtaý basqarmasynyń basshysy Iliias Muhamedjan aitty, dep habarlaidy "Ult aqparat".
«Búgin Shyǵys Qazaqstan oblysynda koronavirýs indetinen bir adam kóz jumdy. Ókinishke qarai, bul jaǵdai Óskemen qalasynda tirkeldi. Ol 1979 jyly dúniege kelgen áiel. 12 sáýir kúni jedel járdem brigadasymen arnaiy provizorlyq statsionarǵa jetkizilgen. Ol jerde arnaiy PTR-diagnostikasy ótkizilip, virýstyq indet rastaldy. Naýqas túsken kezde jaǵdaiy aýyr boldy. Diagnoz rastalǵannan keiin azamatsha arnaiy infektsiialyq boksqa, qarqyndy emdeý palatasyna aýystyryldy. Túsken kezdegi jaǵdaiy óte aýyr», - dedi ol.
Onyń dereginshe, naýqas ekijaqty pnevmoniia, sol jaqty plevrit, jiti respiratorlyq distress-sindrom, sonymen qatar aýyr alkogoldik intoksikatsiia diagnozymen túsken.
«Naýqastyń ómirin saqtaý úshin barlyq dáriger-reanimatologtar ózderiniń qural-jabdyqtarymen, kerekti apparattarymen kómek kórsetti. Azamatsha ókpeni jasandy jeldetý apparatyna qosylǵan bolatyn. Túni boiy eki márte júregi toqtaǵan. Reanimatsiialyq is-sharalardyń nátijesi oń boldy. Úshinshi márte júregi toqtaǵan kezde reanimatsiialyq áreketter nátije bermedi. Júrek qyzmetin qaitadan qalpyna keltirý úshin áriptesterimiz barlyq kúsh-jigerin saldy. Biraq, ókinishke qarai, ol ómirden ótti. Naýqastyń týǵan-týystary men jaqyndaryna qaiǵyra kóńil aitamyz», - dedi basqarma basshysy.
Iliias Muhamedjannyń aitýynsha, qaitys bolǵan áielmen bailanysta bolǵan 13 adam anyqtalyp, oqshaýlandyryldy. Analizder alyndy.
«Qazirgi tańda keńeitilgen epidemiologiialyq is-sharalar ótkizilip jatyr. Turǵylyqty jeri men oshaqtar tolyqtai zalalsyzdandyryldy», - dedi ol.
Shyǵys Qazaqstan oblysynda koronavirýstan bir adam kóz jumǵanyn buǵan deiin jazǵan bolatynbyz.
