Koronavirýstan qaitys bolǵan dárigerdiń otbasyna tekserý júrgizilmesten tólemaqy berilsin. Bul týraly koronavirýs indetiniń ekinshi kezeńine daiyndyq máseleleri boiynsha keńeste Memleket basshysy Qasym-Jomart Toqaev aitty, dep habarlaidy "Ult aqparat".
Indettiń ekinshi tolqyny jaǵdaiynda negizgi soqqyny taǵy da medikter ózderine alady. Dári-dármek pen apparattar emes, dál solar bizdiń negizgi resýrstarymyz sanalady. Meditsina qyzmetkerlerin qoldaý qajettigi eshkimge kúdik týdyrmaidy. Meniń tapsyrmammen ekinshi jartyjyldyqta tólemaqyǵa 150 mlrd teńgeden astam qarjy bólindi. Degenmen, tólemaqy men saqtandyrý tólemin alýda áli kúnge deiin biýrokratiialyq kedergiler jasalyp, tipti bul máselemen Parlament te ainalysty. Jergilikti jerlerde tólemaqy boiynsha «tsifrlarmen oiyn» jalǵasyp, olardy bólýdiń áli kúnge deiin ashyqtyǵy joq. Bul jol berýge bolmaityn ahýal. Buǵan qosa, bas dárigerler jumys ýaqytyn dárigerdiń paidasyna emes túzetýge tyrysady. Meditsina qyzmetkerleri ózderine tiesili aqshany ótinip surap alýǵa tiis emes», - dedi Memleket basshysy.
QR Prezidentiniń dereginshe, 2020 jyldyń 30 qyrkúiegindegi jaǵdaiǵa sáikes, indet kezeńinde koronavirýstan 182 meditsina qyzmetkeri qaitys boldy.
«Qazir bul jaǵdailar túrli komissiiada qaralyp, ótemaqy tek 37 ǵana otbasyǵa tólengen. Múldem jol berýge bolmaityn jaǵdai. Postfaktým ólim sebebin anyqtaý kóptegen qiyndyqtardy, onyń ishinde ádep sipatyndaǵy qiyndyqtardy týdyrady. Osyǵan orai Úkimetke bul máselede mundai tekserýler júrgizbesten qaza tapqan meditsina qyzmetkeriniń otbasyna tiesili barlyq tólemaqyny tóleýdi tapsyramyn», - dedi Qasym-Jomart Toqaev.
Sonymen qatar Memleket basshysy meditsina qyzmetkerleri qyzmet barysynda aýrý juqtyryp alǵany dáleldengen jaǵdaida qysqa merzimniń ishinde tólemaqy múltiksiz tólenýi tiistigin basa aitty.
«Koronavirýspen kúres úshin ústemaqynyń bir bóligin ákimshileý ákimdikterdiń jelisi arqyly júrgiziledi. Osyǵan orai óńir ákimderine bul máseleni jeke baqylaýda ustaýdy tapsyramyn», - dedi QR Prezidenti.
