Májilistegi Qazaqstan halyq partiiasy fraktsiiasynyń depýtattary koronavirýs indetine shaldyqqandardy emdeýge arnalǵan nysandardyń qurylysyna qatysty egjei-tegjeili tekserý júrgizýdi surady, dep habarlaidy QazAqparat.
«Keibir málimetterge sáikes, BI Group jekelegen koronavirýs gospitalderin salý kezinde óńirlerde buzylǵan ǵimarattardyń qurylys materialdaryn paidalanǵan. Atap aitqanda, Atyraý oblysynyń Opornyi kentinde TShO qyzmetkerlerine arnalǵan jataqhana bólshektelgen. Al qurylys materialdary quny 5,5 mlrd teńge bolatyn modýldi koronavirýs aýrýhanasyn salý úshin Almatyǵa jiberilgen. Joǵaryda atalǵan eldi meken Atyraý qalasynan shamamen 300 shaqyrym jerde ornalasqan», - dedi Jambyl Ahmetbekov Májilistiń jalpy otyrysynda Úkimet basshysynyń orynbasary Roman Skliardyń atyna joldaǵan saýalynda.
Sonymen qatar depýtat Shymkentte jáne Almatyda eki modýldi aýrýhananyń sapasyz salynǵanyna, qarajattyń orynsyz jumsalýyna bailanysty sybailas jemqorlyqqa qarsy qyzmet is qozǵalǵanyn atap ótti. Al Almaty gospitalin salý barysynda memleketke shyǵyn kelgenin aýditorlyq tekserý rastady. Tergeý nátijesi áli jariialanǵan joq.
Osyǵan bailanysty ol Qazaqstan halyq partiiasynyń depýtattary atynan tiisti usynystaryn jariialady.
Depýtattyń paiymynsha, 2020-2021 jyldary BI Group óńirlerde koronavirýs gospitalderin qalai salǵanyn, olardyń qalai jumys istep turǵanyn, meditsinalyq qyzmet kórsetý sapasyn jiti tekserýi kerek.
«Indýstriia jáne infraqurylymdyq damý ministrligi Qurylys jáne turǵyn úi-kommýnaldyq sharýashylyq isteri komiteti, Qazaq qurylys jáne sáýlet ǵylymi-zertteý men jobalaý institýty sarapshylaryn tarta otyryp, 2020-2021 jyldary BI Group óńirlerde salǵan koronavirýsqa arnalǵan nysandardyń qurylysynyń smetalyq qunynyń sapasy turǵysynan egjei-tegjeili jáne ashyq kásibi aýdit júrgizýi kerek», - dedi Ahmetbekov.
