Memleket basshysy Qasym-Jomart Toqaev koronavirýspen kúres sharalaryn qaita qaraýdy usyndy, dep habarlaidy QazAqparat.
«Jalǵasyp jatqan pandemiia jaǵdaiyndaǵy damýǵa kelsek, 1,5 jyl boiy koronavirýs progresti tejeýde. Jańa shtamdar tolqyny koronavirýstyń bizdiń ómirimizge dendep engenin kórsetedi. Biz oǵan beiimdelip, osyndai jaǵdaida ómir súrýdi úirenýimiz kerek. Bul eń aldymen shekteý sharalary men memleket ómiri arasyndaǵy tekserilgen syndarly teńgerimdi izdeýdi bildiredi. Pandemiiamen kúres paradigmasy kóz aldymyzda ózgerip jatyr. Qazir de kóptegen elder virýstyń taralýyn nólge deiin tómendetýdi maqsat etpeitin boldy», - dedi Prezident Úkimettiń keńeitilgen otyrysynda.
Onyń aitýynsha, qazirgi ózekti mindet – infektsiianyń iri oshaqtaryn azaitý jáne densaýlyq saqtaý júiesiniń shamadan tys júktemesine jol bermeý.
«Biz virýsqa qarsy is-áreket sharalaryn túbegeili qaita qarap, sapaly jańa strategiia ázirleýimiz kerek. Jańa shtammdar tipti vaktsina alǵandarǵa da juǵatynyna kóz jetkizdik. Alaida immýndaý jumystary aýrýdy jeńildetedi jáne ólim qaýpin azaitady. Osyǵan negizdelý kerek. Virýs juqtyrǵandar boiynsha statistikalyq derekter shara qabyldaý úshin jalǵyz negiz bolmaýy kerek. Basty nazardy aýyr jaǵdailar men ólim-jitimdi azaitýǵa jáne kúrdeli naýqastardy emdeýge aýdarý qajet», - dep túiindedi Prezident.
Buǵan deiin Prezident antivakserlerdiń qaýeset, dańǵaza áńgimelerine senýdiń qajeti joq degen edi.
