QR Densaýlyq saqtaý ministri Eljan Birtanov Nur-Sultanǵa kelgen qytailyq dárigerlermen onlain bailanys arqyly pikir almasty, dep habarlaidy QazAqparat.
«Qytailyq áriptestermen tyǵyz bailanysta boldyq. Jalpy, indetpen kúreste sizderge jáne Qazaqstannyń dárigerlerine alǵys aitqym keledi. Meditsina qyzmetkerlerimiz álemdik tájiribeni zertteýge ashyq, Dúniejúzilik densaýlyq saqtaý uiymymen de jumys isteýdemiz. Búginde ǵylymi meditsina bar, sáikesinshe, tek ǵylym negizinde úzdik tájiribelerdi zerttep, engizýimiz kerek. Sondyqtan Qytaidan kelgen dárigerlerdiń ozyq tájirbelerin zertteýdiń múmkindigi boldy», - dedi E. Birtanov.
Osy oraida ministr QHR dárigerleriniń tájiribe almasý úshin kelgen sapary bul saladaǵy yntymaqtastyqty nyǵaitýǵa tyń serpin beretinin aitty. Sonymen qatar, elimizde koronavirýspen kúres sharalaryna jumyldyrylǵan dárigerlerdiń Qytaiǵa saparyn uiymdastyrýdyń mańyzdylyǵy atap ótildi.
Bul turǵyda Eljan Birtanov bul bastamany diplomatiialyq jolmen pysyqtaý kerektigin jetkizdi.
«Meniń oiymsha, bul baǵyttaǵy tájiribe almasý sharalary óte mańyzdy bolady. Koronavirýspen kúresti tiimdi júrgizý úshin atalǵan usynysty pysyqtaýdy suraimyn. Qajet bolǵan jaǵdaida, Qytaidyń Densaýlyq saqtaý ministrine tiisti hatty joldaýǵa ázirmin», - dedi vedomstvo basshysy.
Onlain-konferentsiia sońynda E. Birtanov QR Densaýlyq saqtaý ministrligi atynan elimizde koronavirýs infektsiiasymen kúresýge qosqan zor úlesi úshin qytailyq delegatsiiaǵa alǵys aitty. Osy oraida kórshi eldiń dárigerleri «QR Densaýlyq saqtaý isine qosqan úlesi úshin» tósbelgisimen marapattaldy.
Esterińizge sala keteiik, 9 sáýir kúni Qytaidyń Shyńjan-Uiǵyr avtonomiialyq ólkesinen dárigerler Qazaqstan astanasyna keldi.
Qytaidan arnaiy kelgen 10 dárigerdiń arasynda pýlmonolog, epidemiolog mamandar, qoǵamdyq densaýlyq saqtaý sarapshylary bar. 15 kúndik saparda olar koronavirýs infektsiiasyn juqtyrǵandardy diagnostikalaý, emdeý jáne qoǵamdyq densaýlyq saqtaý máselelerin talqylady.
