Aqtóbe oblystyq densaýlyq saqtaý basqarmasy jótelip, dene qyzýy kóterilgenderdiń kóbi úiden emdelip, aýrýyn asqyndyryp alǵanyn aitady. Bul týraly basqarma basshysynyń orynbasary Bekbolat Izbasarov brifingte málim etti, dep habarlaidy QazAqparat.
Aqtóbe oblysy boiynsha sońǵy táýlikte 17 adamnan koronavirýs infektsiiasy anyqtaldy. Onyń kóbi Aqtóbe qalasynyń, ózgesi Alǵa, Mártók, Muǵaljar aýdandarynyń turǵyndary. Dál qazirgi ýaqytta taǵy 400-den astam adam úi karantininde. Olardyń bári dárigerler qaraýyna alynǵan.
«17-21 qańtar kúnderi aralyǵynda 70 adam koronavirýs infektsiiasyna shaldyqty. Qańtar aiynda barlyǵy 85 adamnan pnevmoniia anyqtaldy. Jyl basynan beri «Álimbet», «Jaisań» sanitarlyq beketteri arqyly 590 jolaýshy men 300-ge jýyq júrgizýshi, 68 tranzittik kólik júrgizýshisi tekserildi. 39 adamnyń arnaiy anyqtamasy bolmady. Olardyń bári karantintik statsionarǵa jatqyzyldy. Tekserý kezinde 47 adamnan koronavirýs infektsiiasy anyqtaldy. Qazir Batys Qazaqstan oblysy «qyzyl» aimaqqa kirdi. Bul Aqtóbe úshin de qaýipti. Biz saqtyq sharasyn ustanýǵa shaqyramyz. Araqashyqtyqty saqtap, maska taǵýdy umytpańyzdar. Aýrý belgisi anyqtalsa, birden dáriger kómegine júgingen jón», - dedi oblystyq sanitarlyq-epidemiologiialyq baqylaý departamenti basshysynyń orynbasary Muhtar Serbaev.
Osy aptada óńirde 4 adam koronavirýs infektsiiasynan kóz jumǵan.
«Koronavirýs infektsiiasynan kóz jumǵandardyń kóbi – egde jastaǵylar. Bireýi Temir aýdanynyń turǵyny. 83 jastaǵy turǵyn júrek-qan tamyrlary aýrýyna shaldyqqan. Ekinshisi 79 jastaǵy Mártók aýdanynyń turǵyny. Onyń búiregi aýyrǵan. Taǵy ekeýi 55 jáne 68 jastaǵy Aqtóbe qalasynyń turǵyndary. Ekeýiniń de júrek-qan tamyrlary aýyrǵan. Qant diabeti de bar. Mine, osyndai sozylmaly derti bar adamdar úshin koronavirýs infektsiiasy qaýipti. Sonymen birge qazir kóp naýqas jaǵdaiy aýyr kúiinde túsedi. Adamdar úiden em qabyldap, ózderi antibiotik ishpeýi tiis. Jedel respiratorly virýstyq infektsiia da qaýipti. Bul da koronavirýstyń belgilerimen uqsas. Kóbi qarapaiym tumaý dep oilap, júre beredi. Alǵashqy belgi anyqtalsa, birden ýchaskelik dárigerge habar bergen jón. Brigada kelgen kezde PTR test alady», - dedi oblystyq densaýlyq saqtaý basqarmasy basshysynyń orynbasary Bekbolat Izbasarov.
