Búginde álem elderi onyń ishinde qazaqstandyqtarda COVID-19-ǵa qarsy vaktsina jáne revaktsinany qarqyndy alyp jatyr. Osy oraida kópshilikti mazalaityn suraqtyń biri vaktsina adal ma jáne ekpege qatysty din ne deidi? Bul suraqqa elordadaǵy «Áziret sultan» meshitiniń bas imamy Erbolat Júsipov jaýap berdi, dep habarlaidy QazAqparat.
«Dini turǵydan «Vaktsina alǵan jón be?» degen saýal kópshilikti tolǵandyrady. Shariǵatta densaýlyqtyń amanat ekeni aitylady. Bilmegen nárseni sol salanyń mamandarynan sura degen aiat bar. Osy oraida biz vaktsinaǵa qatysty densaýlyq saqtaý salasy mamandarynan suraimyz. Olar vaktsina alý kerek, tipti mańyzdy dep otyr. Sondyqtan indetten saqtaný úshin ekpe alýdy biz qoldaimyz. Óz kezegimizde meshitterde túsindirý jumystaryn turaqty uiymdastyryp turamyz. Iaǵni jamaǵatty vaktsina jáne revaktsina alýǵa shaqyramyz. Koronavirýs indetin jeńemiz desek, ekpe alǵan jón», - dedi Erbolat Júsipov.
Sondai-aq, imam kópshilikti tolǵandyrǵan vaktsina halal ma álde haram ba degenge qatysty túsinik berdi.
«Jii qoiylatyn suraq. Dini saladaǵy pátýaǵa jaýapty mamandar koronavirýsqa qarsy vaktsinany shariǵatqa sai adal, ruqsat berilgenin aitty. Jalpy vaktsinatsiia naýqany endi bastalǵan kezde jamaǵat tarapynan suraq kóp boldy. Turaqty túsindirý jumysynyń nátijesinde búginde adamdardyń ekpege qatysty pikiri oń deýge bolady», - deidi ol.
