Densaýlyq saqtaý ministri Aleksei Tsoi patsientterge úiinde alǵashqy meditsinalyq-sanitarlyq kómek kórsetetin mobildi brigadalar sany osy aidyń sońyna deiin 3,5 myńǵa jetkiziletinin málim etti, dep habarlaidy QazAqparat.
«Sońǵy aptada COVID-19 aýrýyn juqtyrý jáne odan keletin ólim-jitim kórsetkishiniń turaqtalý tendentsiiasy baiqalady. Juqtyrý jaǵdaiy táýligine shamamen 1500-1600 adamdy qurap otyr. Patsientterge úiinde kómek kórsetý maqsatynda alǵashqy meditsinalyq-sanitarlyq kómek beretin 2 962 mobildi brigada quryldy. Osy aidyń sońyna deiin mundai brigadalardyń sany 3,5 myńǵa deiin jetkiziledi. Emhanalardaǵy koll-ortalyqtardyń sany 16 paiyzǵa artty. Onyń jumysyna bilikti keńesshi dárigerler, feldsherler men meditsinalyq JOO stýdentteri tartyldy. Qazirgi tańda infektsiialyq jáne provizorlyq statsionarlarda ókpeni jasandy jeldetetin 1 958 apparat bar. Ákimdiktermen birge qosymsha 4 183 apparaty satylyp alynýda. Onyń 3 105-i otandyq taýar óndirýshilerden alynady. Sonymen birge, 20 myńǵa tarta tósek-oryn ottegige qosylady. Onyń ishinde 17 762 tósek-oryn ottegi kontsentratymen qamtylady. 6 237-i demeýshilerdiń kómegimen qosylǵaly otyr», - dedi Aleksei Tsoi Úkimet otyrysynda.
Ministrdiń aitýyna qaraǵanda, memlekettik jáne jeke zerthana testileý jumysyna belsendi túrde tartylyp, olardyń táýliktik ótkizý qýaty 32 myńǵa jetken. Sondai-aq bir rettik maskanyń baǵasy 28 paiyzǵa arzandaǵan.
