Koronavirýs infektsiiasyn juqtyrǵandar arasynda № 12 qalalyq emhananyń provizory Manat Álmahanova da bar. Ol QazAqparat tilshisine qaýipti virýspen qalai kúreskeni týraly egjei-tegjeili aityp berdi.
Virýs juqtyrǵan Manat Álmahanova 4 mamyrdan beri úiden shyǵa almai otyr.
Alǵash ret 12 sáýir, iaǵni jeksenbi kúni tamaǵy jybyrlai bastaǵanda ol jai ǵana sýyq tigen bolar dep oilaǵan. Emhana qyzmetkeri koronavirýs juqtyrǵany úsh uiyqtasa túsine kirmegenin aitty.
«Bala kezimnen mende sozylmaly angina bar bolatyn. Sodan bolar eski aýyrý dep qamsyz júre berdim. Bir kún ótti. Kelesi kúni denem tońyp, qaltyrap birden qyzýym kóterildi. Alaida ózim provizor bolǵandyqtan qolda bar preparattardyń barlyǵyn ishe bastadym. Biraq, bir baiqaǵanym qansha dári ishsem de maǵan kómektespedi. Birneshe kún ótken soń arqamnyń ókpe tusy aýyra bastady. Sol kezde mende qorqynysh sezimi paida boldy. Aýyryp tursam da aptanyń demalys kúnderin kúttim. Sársenbi kúni jumysta test tapsyrdym. Test nátijesi kúmándi boldy. Sol úshin maǵan PTR taldaýdan ótý usynyldy. Beisenbi kúni PTR tapsyrdym. Juma kúni jumysta dirildep qaltyrap otyra almai kettim. Senbi kúni mende dene qyzýym túsip, tamaǵym aýyrǵany basylǵanymen demikpe, jótel paida boldy. Tósekte gorizontaldy jata almai, tynysym taryla bastady», -dedi Manat.
Onyń aitýynsha, senbi kúni túngi saǵat 23:00 shamasynda qyzmettik chattan «Álmahanova Manat – COVID-19 test oń nátije kórsetti» degen habarlama keldi.
«Osy habarlamadan soń meniń uiqym qashty. Boiymdy úrei, qorqynysh biledi. Jeksenbi kúni tańerteń meni jedel járdem Almaty qalasy ftiziopýlmanologiia ortalyǵyna alyp ketti. Sol jerde dárigerler maǵan emdeý kýrsyn belgiledi. Rentgenge túskenimde nátijesi taza bolyp shyqty. Virýsqa qarsy Alývia degen preparat ishtim», - dedi Manat.
Virýsqa qarsy preparat aýyr bolǵandyqtan, patsientke keri áseri óte kóp bolǵan. Manat birneshe kún boiy qusyp, tamaqqa tábeti nasharlaǵan.
«Júregim aini berdi. Sosyn emdeýshi dáriger Alývia preparatyn birneshe kúnge toqtatty. Ertesine uiqybezdiń, baýyr jumysyn tekserý úshin tamyrdan qan aldy. Biraz kúnde tábetim qaita jaqsarǵan soń dárini qaita qosty. Osylai 10 kún ótti. 10 kúnnen soń taǵy da júregim ainyp qusa bastadym. Odan keiin de dáriger kishkene úzilis berdi. Al jaǵdaiym jaqsy bolatyn. Jótel, entigý 10 kúnde ketken bolatyn. Biraq, dárilerdiń kúshi ishki organdaryma áser ete bastady», - dedi ol.
Ol aýrýhananyń mamandarynyń biliktiligi men emhanadaǵy qyzmetke kóńili tolatyndyǵyn jasyrmady.
«Tamaqtary óte dámdi boldy. Kúndelikti ártúrli jemis-jidek, pisilgen ystyq bálish, buqtyrmalar, salat beretin. Kóp adam as-aýqatqa qatysty narazylyq bildirdi ǵoi. Biraq men jatqan aýrýhanada 5 ýaqyt qunarly tamaq berip turdy. Bergen tamaqtary 10 kúnde qaitalanbady desem de artyq emes. Meditsina qyzmetkerleri bizdiń kóńil-kúiimizdi kóterip, árdaiym pozitiv syilaityn. Dálizde 24 saǵat shai qainap, ústel ústinde shai, qant, tuz turady. Mineraldy sý taratady», - dedi ol.
Aýrýhanaǵa túskenine 15 kún bolǵanda Manat Álmahanova qorytyndy PTR taldaýyn tapsyrǵan.
«Ol kúni qobaljyp, qorqyp kúttim. 4 mamyrda PTR taldaýy alyndy. Nátijesin kútkende de saǵattar jylǵa ainalǵandai boldy. Taldaý nátijesi áli virýs bar ekenin kórsetkende qatty kúizeliske tústim. Odan keiin 7 mamyrda tapsyrǵanda taǵy da test nátijesi qýantpady. Men ózim osy virýstan ómiri qutyla almaityndai kúi keshtim. Qorqynysh, úrei biledi. Senbi kúni estigennen bastap mende bir apta uiqy bolǵan joq. Psihologiialyq turǵydan óte aýyr boldy. 15 mamyrda taǵy qorytyndy PTR tapsyrdym. Sol kezde test nátijesi teris bolyp shyqty. Eki ret qatar teris nátije shyqqan soń 16 mamyrda meni aýrýhanadan shyǵardy», - dedi Manat.
Patsient áli de úiinde 14 kúndik karantinde jatyr.
Qazir ol taǵy da PTR taldaýyn kútip otyr. Teris shyqsa, jumysyna oralmaqshy.
Manat óziniń koronavirýsty naqty qaida juqtyrǵanyn bilmeidi. Ózi qyzmet etetin № 12 qalalyq emhanada odan buryn koronavirýs degen diagnozben 7 adamdy jedel járdemmen alyp ketken.
«Aýrýhanada jatqanda kópshiliktiń bir-aq suraǵy boldy. Shynymen virýs bar ma eken degen. Iá, virýs bar eken. Bolǵanda da jai ǵana tumaý emes, óte aýyr bolady eken. Baiqasańyz men aýrýhanaǵa túskende kóktem bolǵan. Qazir dalada jaz. Al men áli úide qamalyp otyrmyn. Úkimet beretin aqsha úshin aýyryp jatyr degen qaýeset te bar. Biraq men aitar edim, basymnan ótken qiyn ahýaldy qansha aqsha berse de qaitalamaýǵa bar kúshimdi salar edim», - dedi ol.
Manat jalǵyz ózi turady. Sondyqtan da onyń týystary, jaqyndarynda virýs juqtyrý qaýpi bolmaǵan.
