Qazaqstanda koronavirýs infektsiiasyn juqtyrǵan meditsina qyzmetkerlerine ótemaqy tóleý bastaldy. Bul týraly QR Eńbek jáne halyqty áleýmettik qorǵaý ministri Birjan Nurymbetov málimdedi, dep habarlaidy "Ult aqparat".
«Bul ótemaqy Densaýlyq saqtaý men Eńbek jáne halyqty áleýmettik qorǵaý ministrlikteriniń birlesken buiryǵyna sáikes tólenedi. Tólem operatory retinde Memlekettik áleýmettik saqtandyrý qory bekitilgen. Ótemaqy tóleýge ótinishterdi óńirlik densaýlyq saqtaý basqarmalary komissiianyń tiisti sheshimderi negizinde jiberedi», - dep atap ótti ministr Ortalyq kommýnikatsiialar qyzmetinde ótken brifingte.
Ministrdiń aitýynsha, búgin saǵat 14:00-degi jaǵdai boiynsha, ótemaqy tóleýge 6 óńirden 123 ótinish kelip túsken.
«Ereje boiynsha úsh jumys kúninde Memlekettik áleýmettik saqtandyrý qory bul azamattarǵa 2 mln teńgeden tóleýi tiis. Qarajat ótinimde kórsetilgen rekvizitterge jiberiledi. 123 ótinim ishinde qyzmet babymen qaitys bolǵan meditsina qyzmetkerleri joq. Olar boiynsha áli ótinim berilmedi», - dedi B. Nurymbetov.
Eske sala ketsek, qyzmet barysynda koronavirýs infektsiiasyn juqtyrǵan meditsina qyzmetkerine – 2 mln teńgeden, qaitys bolǵan qyzmetkerdiń otbasyna – 10 mln teńge ótemaqy bekitilgen edi.
