Almaty qalalyq Qoǵamdyq densaýlyq saqtaý basqarmasynyń basshysy Tileýhan Ábildaev onlain brifing barysynda epidemiologiialyq ahýal týraly baiandady, dep habarlaidy "Ult aqparat".
«Eki jasar balanyń densaýlyǵy jaqsardy, búgingi kúni qanaǵattanarlyq jaǵdaida. Búgin sońǵy taldaýlaryn kútýdemiz, eger olar teris nátije berse, onda aýrýhanadan shyǵarýǵa daiynbyz», - dedi T.Ábildaev.
Onyń aitýynsha, búginde qalalyq juqpaly aýrýlar aýrýhanalarynda barlyǵy 76 patsient koronavirýstan emdelip jatyr. Onyń ishinde 2-i bala.
«Emdeýge jatqyzylǵandardyń biri Almaty oblysynyń turǵyny ekeni anyqtaldy. 1971 jyly týǵan áiel JRVI belgilerimen jaǵdaiy nasharlap Almatynyń kópbeiindi klinikalyq aýrýhanasyna júgingen. Oǵan zertteýler júrgizilip, eki jaqty tómengi dárejeli pnevmoniia anyqtaldy. COVID 2019-ǵa da taldaýlar alyndy, nátijesi rastaldy. 30-y kúni ol bizdiń qalalyq juqpaly aýrýlar aýrýhanasyna emdeýge jatqyzyldy», - dedi basqarma basshysy.
Basqarma basshysynyń aitýynsha, 66 naýqastyń jai-kúii – qanaǵattanarlyq. 1 eresek adamnyń jaǵdaiy aýyr. 9 eresek adamnyń jaǵdaiy ortasha dep baǵalanyp otyr.
«Jańadan anyqtalǵan 9 adamnyń barlyǵy basqa jaqtan kelgender. 30 naýryzda Ystanbul-Almaty reisimen bes adam ushyp keldi. Altynshy patsient 29 naýryzda Minsk-Almaty reisimen jáne osy aidyń ár kúnderi Dýbaidan úsh adam ushyp keldi», - dedi T.Ábildaev.
Qazir Almatyda provizorlyq ortalyqtarda 697 adam karantinde jatyr, onyń ishinde – 84 bala, eki kúndik karantinde 1029 azamat jáne 3156 adam úi karantininde jatyr.
Al Almatyda koronavirýs infektsiiasynan 7 adam jazylyp shyqqanyn munyń aldynda habarlaǵanbyz.
