Koronavirýs jeltoqsannyń sońy men qańtardyń basynda órshýi múmkin. Mundai boljamdy Qazaqstannyń reprodýktivti meditsina qaýymdastyǵynyń prezidenti, professor Viacheslav Lokshin jasady, dep habarlaidy QazAqparat.
«Eń aldymen, búkil álemde jáne Eýropada koronavirýsqa qatysty qandai jaittyń oryn alyp jatqanyn kórip otyrsyzdar. Onyń Qazaqstanda da oryn alý yqtimaldyǵy bar. Degenmen, ol bizde birshama jeńil ótýi múmkin, Sebebi maýsym men shilde aiynda bizde kóp adam aýyryp shyqty», - dedi qaýymdastyq prezidenti agenttik tilshisine bergen suhbatynda.
Sonymen qatar professor elimizdegi koronavirýs infektsiiasyna shaldyǵýǵa qatysty shynaiy jaǵdai men resmi statistika arasyndaǵy málimetter qarama-qaishylyǵyna qatysty pikir bildirdi.
«Shyndyǵyna kelgende, bizdiń resmi statistikamyz shynaiy jaǵdaidan 20-30 esege az kórsetip otyr. Sebebi adamdardyń kópshiligi meditsinalyq kómekke júgingen joq. Qazir de kóp adam aýyryp júrgenimen, PTR-testileýden ótpeidi. Muny da bilip otyrmyz. PTR-diń oń nátijesi barlyq ýaqytta koronavirýs bola bermeidi. Sonymen qatar teris nátije de virýstyń joq ekendigine dálel bola almaidy. Sol sebepti menińshe, jeltoqsan aiynyń sońy men qańtar aiynyń basynda aýrýǵa shaldyǵý ósimi qazirgiden áldeqaida joǵary bolady», - dedi Viacheslav Lokshin.
Qazaqstannyń reprodýktivti meditsina qaýymdastyǵy prezidentiniń boljamynsha, koronavirýsqa shaldyǵý kórsetkishi, ásirese elimiz óńirlerinde ýshyǵa túsýi múmkin.
«Qazirgi ýaqytta elimizdiń shyǵysy men soltústiginde koronavirýstyń órship turǵany belgili. Mundai jait ońtústikke de kelip jetedi. Sondyqtan oǵan daiyn bolýymyz qajet», - dedi professor.
Osy oraida ol sanitarlyq shekteý sharalaryn saqtaý mańyzdylyǵyna toqtaldy.
«Koronavirýstan saqtanyp, densaýlyǵymyzǵa qaýip tóndirýdiń jalǵyz joly - áleýmettik araqashyqtyq saqtaý, barlyq jerde maska taǵý jáne qoldy únemi jýý. Týǵan kún, úilený toiyn ótkizýdi, jerleý rásimine qatysýdy doǵarý kerek. Jumystan basqasynyń bári toqtaǵany jón. Meiramhanalarǵa jumys isteý kerektigi túsinikti. Biraq, olar saqtyq sharalaryn qazirgiden de qatty saqtaý tiis. Eger dárigerlerdiń usynymdaryn oryndamaityn bolsaq, onda azamattarymyzdan aiyryla beremiz», - dedi Viacheslav Lokshin.
Aita keterligi, ótken táýlikte ǵana Qazaqstanda 762 adamda koronavirýs indeti PTR arqyly rastaldy. Qazirgi ýaqytta elimizde koronavirýstan 9 961 adam emdelýde. Olardyń arasynda 464 bala bar. Jalpy naýqastardyń arasynda 228 adamnyń densaýlyq jaǵdaiy nashar. Sonyń ishinde 22 naýqastyń jaǵdaiy qatty aýyr dep baǵalanyp otyr. 23 naýqas jasandy tynys alý apparatynda jatyr.
