Jambyl oblysy ákimdigi densaýlyq saqtaý basqarmasynyń basshysy Marat Jumanqulov ÓKQ aqparat alańynda koronavirýs indetiniń aldyn alý, profilaktikalyq sharalar týraly baiandap berdi, dep habarlaidy "Ult aqparat".
Spikerdiń aitýynsha, Jambyl oblysy ákiminiń ókimimen oblystyq komissiia quramy, onyń jospary men jumys algoritmi men mindetteri bekitilgen. Barlyq meditsinalyq uiymdar koronavirýsty infektsiiamen aýyratyn naýqastardy qabyldaýǵa jáne emdeýge, sondai-aq statsionarlyq jaǵdaida karantinge oqshaýlaýǵa daiyn.
«Barlyq emdeý, aldyn alý mekemelerinde meditsina qyzmetkerleri úshin sanitarlyq avtotransporttyń, jeke qorǵaný quraldarynyń, dezinfektsiialyq preparattardyń, dárilik zattardyń qajetti qorynyń bolýy qamtamasyz etilgen. 1040 tósektik tósek qory daiyndaldy, onyń ishindegi 400-i - aýrýlardy emdeý úshin, 640 tósek - karantin úshin. Emdeý-aldyn alý is-sharalaryn uiymdastyrý jáne ótkizý úshin joǵaryda kórsetilgen nysandarda 610 joǵary bilikti arnaiy oqytylǵan meditsina qyzmetkeri jumyldyryldy», - dedi basqarma basshysy.
Búgingi tańda oblys aýmaǵyna basqa elderden kelýshilerge tiisti meditsinalyq baqylaý monitoringi júrgizilýde. 17 naýryzdaǵy jaǵdai boiynsha oblys aýmaǵynda 1 a sanattaǵy elderden (QHR, Iran, Ońtústik Koreia, Italiia) kelgen 11 azamat karantinge jatqyzyldy. Barlyq oqshaýlanǵandardyń densaýlyq jaǵdaiy qanaǵattanarlyq. Al, 1 b sanattaǵy elderden (Frantsiia, Germaniia, Ispaniia) úi karantinine 9 adam alyndy. 2 sanattaǵy elderden (Shveitsariia, Ulybritaniia, Niderland) kelgen azamattar joq. Bul jumys kúndelikti, tiisti baqylaýda jáne ári qarai jalǵasýda.
