QR Densaýlyq saqtaý birinshi vitse-ministri Marat Shoranov koronavirýs infektsiiasyna qarsy Spýtnik V vaktsinasynyń qandai jaǵdaida em bolmaityndyǵyn aityp berdi, dep habarlaidy "Ult aqparat".
«Eń aldymen anamnezdegi aýyr allergiialyq reaktsiialar, júktilik jáne bala emizý kezeńderi, 18 jasqa deiingi balalar jáne 65 jastan asqan qarttar. Qazirgi ýaqytta atalǵan sanattaǵy adamdardy vaktsinalaý týraly derekterdiń az bolýǵandyqtan, biz óndirýshiler usynatyn materialdardy únemi zerttep otyramyz jáne osy sanattarǵa vaktsinalardy qaýipsiz júrgizý týraly jańa aqparat túsken saiyn kórsetkishter keńeitilip otyrady», - dedi Marat Shoranov Ortalyq kommýnikatsiialar qyzmetinde ótken baspasóz máslihatynda.
Vitse-ministr preparatty baýyr men búirektiń sozylmaly aýrýy barlarǵa, qant diabeti syndy endokrindik júieniń aiqyn buzylysy baiqalǵandarǵa saqtyqpen qoldaný qajettigin eskertti.
«Qan túzilý júiesiniń aýyr syrqattarynda, epilepsiia, insýlt jáne ortalyq júike júiesiniń basqa aýrýlarynda, júrek-qantamyr júiesi dertterinde, bastapqy jáne qaitalama immýn tapshylyǵy men aýtoimmýndy, sondai-aq, demikpe jáne sozylmaly obstrýktivti ókpe aýrýlarynda saqtyq tanytý qajet. Diabetpen jáne metabolikalyq sindrom, atopiia men ekzema allergiialyq reaktsiialary, sondai-aq qaterli isik, qaterli qan aýrýlary bar naýqastarǵa vaktsina salarda aǵza jaǵdaiyn jekelei qarastyrý kerek. Iaǵni, bul jaǵdailar absoliýtti qarsy kórsetilimderge jatpaidy jáne vaktsinalaý kezinde ár naýqastyń jalpy jaǵdaiyna qarai bailanysty derbes taǵaiyndalýy tiis», - dep túsindirdi M. Shoranov.
