Koronavirýs qaýpi jaily eń alǵash aqparattar shyǵa bastaǵanda dúiim jurt dúrligip, kóptiń nazary shekaradaǵy beketterge aýǵan edi. Qazaqstan men Qytai arasyndaǵy sondai stantsiialardyń biri – Almaty oblysynyń Panfilov aýdanyndaǵy Altynkól beketi. Alaida alǵashqy kúnnen bastap Altynkól stantsiiasynyń sanitarlyq-karantindik qyzmeti shekaradaǵy birde-bir adamdy tekserissiz ótkizbei, jaǵdaidy qatań baqylaýda ustap keledi.
Altynkól stantsiiasyndaǵy sanitarlyq-karantindik qyzmet Densaýlyq saqtaý ministrliginiń Taýarlar men kórsetiletin qyzmetterdiń sapasy men qaýipsizdigin baqylaý komitetiniń aýmaqtyq departamentine qaraidy. Mundaǵy sanitarlyq-karantindik baqylaý bólimniń basshysy Ǵaliolla Nýrýllin birneshe mamanmen birge kúndiz-túni demalyssyz tekseris jumystaryn júrgizip keledi eken.
«Qazirgi ýaqytta Qazaqstan men Qytai arasyndaǵy tek lokomotiv brigadasynyń músheleri júk tasymalyn oryndap júr. Júk tasymaldanǵan kezde lokomotivtiń eki qyzmetkeri ǵana júredi. Buryn osy qyzmetkerlermen oqý-jattyǵý jiynyn ótkizgenbiz. Qazir birde-bir jolaýshy ary nemese beri óte almaidy. Tek júk tasymaly bar. Lokomotiv brigadasynyń múshelerin biz birden neitraldy aýmaqqa aparyp, termometriiadan, saýalnamadan ótkizemiz. Keide kúnine 8 adam, keide 30 adamǵa deiin tekseriledi», - deidi Ǵaliolla Nýrýllin QazAqparat tilshisine telefon arqyly bergen suhbatynda.
Altynkól stantsiiasynda jumys kúndiz-túni toqtamaidy.
Táýliktik sanitarlyq-epidemiologiialyq tekseris kúsheitilgen. Barlyq brigada jumys rejimin qataityp, tipti qosymsha kómek retinde issaparmen kelip, jumys istep jatqandar bar.
