Ortalyq kommýnikatsiialar qyzmetindegi brifingte QR Memlekettik bas sanitarlyq dárigeri Aijan Esmaǵambetova Atyraý oblysyndaǵy Teńiz kenishinde 935 adam koronavirýs juqtyrǵanyn aitty, – dep habarlaidy «Ult aqparat».
«Indetke shaldyǵý kórsetkishiniń ósimine jabyq ujymdardaǵy naýqastar sanynyń artýy sebep bolyp otyr. Búgingi kúni 935 jaǵdai tirkelgen Teniz kenishinde syrqattanýshylardyń artýy baiqalady. Shymkentte de «PetroKazakhstan Oil Production» JShS qyzmetkerleri arasynda jappai syrqattaný tirkeldi. Kompaniia qyzmetkerleri arasynda 101 jaǵdai, merdiger uiymdarda - 23 jáne úi oshaqtarynda bailanysta bolǵandar arasynda 69 jaǵdai tirkelip otyr. Qaraǵandy oblysynda «Qazaqmys» koroporatsiiasy kenishteriniń birinde 34 jaǵdai tirkeldi», - dedi búgin elimizdiń bas sanitarlyq dárigeri.
Onyń atap ótýinshe, Teńiz kenishinde syrqattanýdyń artýyna bailanysty Atyraý oblysyna úkimettik komissiia jiberilgen. Komissiia sheshimimen atalǵan kenishte koronavirýstyń aldyn alýǵa baǵyttalǵan jumystardyń jospary, kestesi qabyldandy.
«Qazirgi ýaqytta atalǵan jospardyń, kesteniń oryndalýyna baqylaý júrgizý qajet. Olai bolmaǵan jaǵdaida, naýqastar sanynyń artýyna bailanysty oqshaýlanýǵa jáne kásiporynnyń ózdiginen ne májbúrli túrde jabylýyna alyp keledi», - dedi Aijan Esmaǵambetova.
