Densaýlyq saqtaý ministrligi jariialaǵan 20 qańtardaǵy epidemiologiialyq ahýaldy baǵalaý matritsasy boiynsha Taraz qalasy men Shyǵys Qazaqstan «sary aimaqqa» endi, – dep habarlaidy «Ult aqparat».
Jambyl oblystyq densaýlyq saqtaý basqarmasynyń basshysy Áset Qalievtiń aitýynsha, óńirde juqpaly aýrýlar aýrýhanasyndaǵy 1000 kereýettiń júktemesi 454 oryndy qurap otyr. Karantin statsionarynda – 23 adam, úi karantininde – 1341 adam jatyr, 240 myń jambyldyq PTR-testileýden ótken. Sońǵy aptanyń qorytyndysy boiynsha virýs juqtyrǵandardyń eń kóbi Taraz qalasynda (85 jaǵdai, ósim 3,5%), Jambyl aýdanynda (9 jaǵdai, ósim 3,4%) jáne T.Rysqulov (7 jaǵdai, ósim 3,9%) aýdanynda tirkelgen. Sondai-aq, KVI sebepteri boiynsha jedel járdemdi shaqyrtýlar sany otyz paiyzǵa artqan.
Eske sala ketsek keshe, iaǵni 19 qańtarda Densaýlyq saqtaý ministri Aleksei Tsoi sol kúngi jaǵdai boiynsha «qyzyl» aimaqta 6 óńir (Aqmola, Pavlodar, Atyraý, Qostanai, Soltústik Qazaqstan oblystary men Nur-Sultan qalasy), al «sary» aimaqta úsh óńir (BQO, Almaty men Qaraǵandy oblystary) turǵanyn málim etken edi . Búgingi matritsa «sary» aimaqqa Shyǵys Qazaqstannyń kirgenin kórsetip tur. Qalǵan óńirlerdiń bári de «jasyl» aimaqta ornalasqan. Al jalpy Qazaqstan halyqaralyq deńgeide indet qaýpi jaǵynan «sary» aimaqqa engizilgen.
