Qazir halyq arasynda koronavirýstan keiin shashtyń túsýi jiileidi degen pikirler kezdesedi. Osy oraida atalǵan taqyryp tóńiregindegi saýaldarǵa bas terisi aýrýlaryn emdeýmen ainalysatyn triholog dáriger Delnur Qambarova jaýap berdi, dep habarlaidy QazAqparat.
«Sońǵy ýaqytta bizdiń ortalyqqa shash túsýi máselesimen emdelýge keletinder kóbeidi. Bul kezdeisoq jaǵdai emes. Sebebi koronavirýspen aýyrǵan naýqastarda shashtyń túsýi jii kezdesedi. Indet organizmdegi túrli virýstarǵa qarsy turatyn immýndyq júieni joiyp jiberedi. Sondai-aq, aǵzadaǵy usaq tamyrlardy zaqymdaidy. Iaǵni, kapilliar tamyrlarda tromboz (qan ainalymynyń baiaýlaýy) paida bolady. Al shash negizgi qoregin osy usaq tamyrlar arqyly alady.
Bizdiń kúnedelikti ishetin taǵamdardyń qunary qan quramyna túsip, birinshi rette júrek, búirek jáne ókpege baǵyttalady. Al odan qalǵan qan quramyndaǵy nárli zattar usaq tamyrlar arqyly bas terisine barady.
Al koronavirýsqa shaldyqqandardyń qany uiyp, saldarynan kapilliar tamyrlar biteledi. Osy kezeńde shash qajetti qoregin ala almaidy. Bul shashtyń erte túsýine alyp keledi», - deidi Delnur Abdýkaharqyzy.
Triholog mamannyń aitýynsha, koronavirýstan emdelip shyqqan naýqasta shashtyń túsýi 3-5 aidan soń bastalady.
«Elimizde koronavirýs infektsiiasy maýsym-shilde ailarynda órshidi. Osy aralyqta indetke shaldyqqan adamdar shash túsýiniń jiilegenin tek endi baiqap jatyr. Bul dert jas ereksheligine qaramastan kóbinde kezdesedi.
Degenmen, qobaljýdyń qajeti joq. Sebebi koronavirýs saldarynan paida bolǵan shash túsý aýrýy emdeledi. Tek der kezinde dáriger kómegine júginseńiz bolǵany. Mamandar keshendi em arqyly qan ainalymyn rettep, durys tamaqtaný joldaryn usynady.
Qazir boiynda qorektik zattary mol taǵamdardy tutynǵan jón. Quramynda qanty bar gazdalǵan sýsyndardan bas tartý kerek.
Óitkeni mundai sýsyndardyń quramyndaǵy ziiandy zattar tamyrdy bitep, qan ainalymy júiesin buzady. Sonymen qatar, fastfýd jáne jartylai daiyn ónimderden de bas tartqan abzal.
Kerisinshe qoi etin jáne sút ónimderin jii tutynǵanymyz durys. Indetten qorqyp, kúizeliske túsýdiń qajeti joq. Sebebi stresske boi aldyrǵan adamnyń bas terisindegi usaq tamyrlary qalypty jumys isteýin toqtatady» , - dep atap ótti Delnur Qambarova.
Dáriger pikirinshe, taza aýada serýendep, dene shynyqtyrý jattyǵýlaryn jasaý qan ainalymyn retteýge kómektesedi.
Sondai-aq D dárýmenin qoldaný immýndyq júieni qalypqa keltirýge yqpal etedi.
Degenmen mamandar úide óz betinshe em almai, birinshi kezekte dáriger kómegine júginýge keńes beredi.
