Qazaqstannyń reprodýktivti meditsina qaýymdastyǵynyń prezidenti, professor Viacheslav Lokshin elimizdegi koronavirýs pandemiiasynyń taralýyna qatysty oiymen bólisti, dep habarlaidy QazAqparat.
«Sońǵy birneshe apta boiy ahýal birshama turaqty bolyp tur. Mundai jait qaýipsizdik sharalaryn saqtaýdy baqylaýǵa alýmen bailanysty siiaqty. Qazaqstannyń soltústiginde ahýaldyń aitarlyqtai turaqtanǵanyn baiqap otyrmyz. Degenmen, jeltoqsannyń sońy men qańtardyń basynda koronavirýstyń órshýinen jaltara almaityn siiaqtymyz. Óitkeni, tyiym sharalaryn buzý kóp kezdesýi yqtimal. Iaǵni adamdar jańajyldyq merekelerdi atap ótýge tyrysary anyq», - dedi Viacheslav Lokshin.
Onyń aitýynsha, qazirgi ýaqytta áleýmettik araqashyqtyqty barynsha saqtap, maska taǵý, gigienalyq saqtyq sharalaryn múltiksiz oryndaý mańyzdy mindet sanalady.
«Ókinishke qarai, kópshilik muny saqtai bermeidi. Sol sebepti halyqqa únemi júginip, qaýipsizdik sharalaryn saqtaý mańyzdyǵyn túsindirip otyrǵan jón. Eýropada, Reseide ahýaldyń qalai boljap bolmaityn jaǵdaida damyǵanyn, órshigenin kórip otyrmyz. Mine, osyǵan bailanysty aýrý juqtyrýdyń ósimi qalai desek te qańtardyń basynda nemese jeltoqsannyń sońynda artýy múmkin. Biraq, bári tikelei ózimizge bailanysty. Eger barynsha qatań sharalarmen adamdardyń ózara bailanysyn shektei alsaq, onda pandemiia tolqyny barynsha jumsaq óteri anyq. Buǵan qosa, maýsym-shilde ailarynda aýrýdyń resmi tirkelgen kórsetkishten 10 ese joǵary bolýy esebinen ujymdyq immýnitet birtindep qalyptasyp kele jatyr. Ol kezde adamdardyń basym bóligi aýryp qalsa da meditsinalyq kómekke júginbedi, tipti tekserýden de ótpedi. Úilerinde em aldy», - dedi sarapshy.
Sonymen qatar Qazaqstannyń reprodýktivti meditsina qaýymdastyǵynyń prezidenti halyqty jappai vaktsinatsiialaýǵa qatysty pikirimen bólisti.
«Vaktsinatsiianyń birtindep bastalýy óte jaqsy. Biraq, vaktsinaǵa qatysty týyndap otyrǵan másele óte kóp. Vaktsina salynǵan kezeńde jáne onyń áseri bastalǵan ýaqytta adamdardyń aýyryp qalǵan jaǵdailary boldy. Demek, bul problemany tez arada sheshý emes. Árine, vaktsina jaqsy. Biraq, qandai vaktsinanyń barynsha sapaly ekendigin ýaqyt kórsetedi. Ázirshe reseilik vaktsina birneshe ondaǵan myń adamǵa ǵana egilgen. Alaida, bul vaktsinanyń jaqsy, tiimdi ekendigin tolyqtai túsinýge jetkiliksiz. Reseide Chýmkov atyndaǵy ortalyq úshinshi vaktsina daiyndap jatyr. Pfizer óz vaktsinasyn Qazaqstanda tirkeýge úmitti. Menińshe, 2021 jyldyń jaz ailaryna qarai ahýal turaqtanatyn bolady. Vaktsinatsiialaý eń aldymen dárigerlerge, qart adamdarǵa júrgiziledi. Al bul óte jyldam oryndalatyn jumys emes. Óitkeni, sóz milliardtaǵan adamnyń ómiri jaiynda bolyp otyr. Sondyqtan arqany keńge salyp, erkinsýge bolmaidy», - dedi Viacheslav Lokshin.
