Elordada Nursultan Nazarbaev atyndaǵy áýejaiǵa kelgen 600-ge jýyq jolaýshy oqshaýlandy. Bul týraly Nur-Sultan qalalyq qoǵamdyq densaýlyq saqtaý basqarmasynyń basshysy Sáýle Qisyqova aityp berdi, dep habarlaidy QazAqparat.
«TJ rejiminiń engizilýine bailanysty, Nur-Sultan qalasyndaǵy Nursultan Nazarbaev atyndaǵy áýejaiǵa keletin barlyq jolaýshylardy oqshaýlaý týraly sheshim qabyldandy.
22 naýryzda 6 reis arqyly - Dýbai, Tokio, Minsk, Máskeý, London, Ystanbul qalalarynan 596 jolaýshy keldi. Onyń 577-si nemese 97 paiyzy koronavirýstyq infektsiiaǵa zerthanalyq tekserý júrgizý úshin karantindik statsionarǵa jatqyzyldy», - dedi basqarma basshysy «Habar 24» telearnasynda ótken brifingte.
Taldaý nátijesi boiynsha olardy úi karantinine jiberý nemese infektsiia anyqtalǵan jaǵdaida infektsiialyq statsionarǵa jatqyzý týraly sheshim qabyldanady.
«Epidemiologiialyq jaǵdaiy qolaisyz 1A sanatyndaǵy elderden kelgen 12 jolaýshy áýejaidan dereý provizorlyq statsionarǵa jiberildi. Osylaisha, Nur-Sultan qalasynyń turǵyndaryna shet elderderden kelgen jolaýshylardyń tekserýsiz qala aýmaǵyna kirmeitinin aitqymyz keledi», - dedi S. Qisyqova.
Aita keteiik, Qazaqstan Respýblikasy aýmaǵynda koronavirýs infektsiiasyn juqtyrǵan jalpy 56 naýqas tirkeldi. Nursultan qalasynda 31 adamda koronovirýs infektsiiasy anyqtaldy. Almaty qalasynda - 22 adam, Qaraǵandy qalasynda - 2, Almaty oblysynda 1 adam.
