Elordada koronavirýs juqtyrǵan naýqastyń eń kishisi - 14, al úlkeni 59 jasta. Bul týraly Ortalyq kommýnikatsiialar qyzmetindegi brifingte Nur-Sultan qalasy Qoǵamdyq densaýlyq saqtaý basqarmasynyń basshysy Sáýle Qisyqova aitty, dep habarlaidy QazAqparat.
«Koronavirýs juqtyrǵan elordadaǵy 18 adam da Qazaqstan azamattary. Eń kishisi - 14 jasta, eki adamnyń jasy 59-da. Jalpy, virýs juqtyrǵandardyń 70 paiyzy 30 ben 49 jas aralyǵyndaǵy azamattar. Barlyǵynyń jaǵdaiy jaqsy, dene qyzýlary qalypty. Qajetti emdeý sharalary jasalyp, meditsinalyq kómek kórsetilip jatyr», - dedi ol BAQ ókilderiniń saýalyna orai.
Sonymen qatar basqarma basshysy koronavirýs juqtyrǵan adamdardy emdep jatqan meditsina qyzmetkerleri úilerine barmaityndyǵyn atap ótti.
«Infektsiia anyqtalǵan aýrýlar jatqan mekemedegi 60-tan astam dáriger men meiirbikeler sol jerden shyqpaidy. Ǵimarattyń bir bóliginde olarǵa jaǵdai jasalǵan. Jumys ýaqyty bitken soń sol jerde demalyp, tamaqtanady. Sodan keiin kelesi aýysymǵa jumysqa túsedi. Bul indetke bailanysty qolǵa alǵan sharamyz», - dedi Sáýle Qisyqova.
