Qyzylorda oblysynyń bas sanitar dárigeri Áliia Ábdiqaiymova óńirde koronavirýs infektsiiasyna bailanysty qalyptasqan tótenshe jaǵdai ýaqytynda kópshilikti qonaqqa barmaýǵa jáne úige qonaq shaqyrmaýǵa shaqyrdy, dep habarlaidy "Ult aqparat".
Qazir oblys elimizde koronavirýs infektsiiasyn juqtyrǵan adamdar sany jóninen aldyńǵy úshtikte tur. Oblysta osyǵan bailanysty tiisti shekteý engizilip, Qyzylorda qalasy men birqatar aýdandarda karantin jariialanǵan.
«Aita keterligi, aimaqta koronavirýs infektsiiasyn juqtyrǵan turǵyndardyń 60-70 protsentin jastar quraidy. Olardyń tarapynan keibir keleńsiz oqiǵalar oryn alyp jatady. Máselen. elordadan kelgen stýdent qyz aýylda dostarymen basqosý ótkizgen. Sonyń saldarynan birneshe adamǵa koronavirýs infektsiiasy diagnozy qoiyldy. Shaǵyn ǵana aýyldan 25 adamnyń qaýipti indetti juqtyrýy alańdatady. Sondyqtan biz osy baǵytta karantin erejelerin qatańdata tústik. Endi oblys aýmaǵynda 2-3 adam bolyp toptasyp júrýge tyiym salyndy. Ólim-jitim, toiǵa barýǵa bolmaidy.», - dedi oblystyq Taýarlar, qyzmetterdiń sapasy men qaýipsizdigin baqylaý departamenti basshysynyń orynbasary, aimaqtyń bas sanitar dárigeri Áliia Ábdiqaiymova.
Ol keibir otbasylardyń jaqyndary elimizdiń túkpir-túkpirinde turatynyn biletinin aityp ótti.
«Olar janaza men toilardan qalmaýǵa tyrysady. Qazir mundai sharalar infektsiianyń taralýyna óte qaýipti bolyp tur. Sondyqtan turǵyndardan barlyq qaýipsizdik sharalaryn saqtaýdy suraimyz. Úi karantinin saqtańyzdar!», - dedi Áliia Ábdiqaiymova.
Sońǵy derek boiynsha Qyzylorda oblysynda 69 adam koronavirýs infektsiiasyn juqtyrǵan.
