Qytaida koronavirýs infektsiiasy juqqan naýqastardyń 93%-dan astamy aýrýynan aiyqqan, - dep habarlaidy Tótenshe jaǵdai rejimin qamtamasyz etý jónindegi Memlekettik komissiianyń Jedel shtaby.
Qazirgi ýaqytta bul elde syrttan kelgen jáne jergilikti jerde koronavirýs infektsiiasyn juqtyrǵandardyń sany kún saiyn azaiyp keledi. Sońǵy málimetterge sáikes, Qytaida koronavirýs juqtyrǵandar sany 82 798-di quraǵan, onyń 77 207-si emdelip, aýrýhanadan shyǵarylǵan. Bul jalpy naýqastar sanynyń 93,2%-yn quraidy. Aýrýhanalarda shamamen 1 myń emdelýshi qalǵan.
QHR Densaýlyq saqtaý máseleleri jónindegi memlekettik komitetiniń málimetteri boiynsha, koronavirýs infektsiiasyn juqtyrǵandardyń 93,2%-y saýyǵyp, 5,59%-y qaitys bolǵan.
