Qytaidaǵy týroperatorlar Ai kúntizbesi boiynsha toilanatyn Jańa jyl merekesinde (Chýntsze, kóktem merekesi) eldegi azamattardyń jappai sapary 2019 jylǵy deńgeiden 60%-ǵa tómendeitinin boljap otyr, dep habarlaidy QazAqparat.
Qytaidaǵy ulttyq Jańa jyl biyl 12 aqpanǵa tuspa-tus keledi, alaida eldegi turǵyndardyń jappai aýyly men týǵan úiine sapar shegý kezeńi – (chýniýn dep ataidy) 28 qańtarda bastaldy. Ol qyryq kúnge sozylady.
Eń iri týristik «Qunar» saitynyń habarlaýynsha, mereke qarsańynda reister men qonaqúilerdi brondaýdyń aitarlyqtai ósýi baiqalmady. «China Railway» temirjol operatory da temirjol sapary 407 millionnan 296 millionǵa deiin tómendeitinin boljap otyr.
Qytai kólik ministrliginiń habarlaýynsha, biyl «chýniýn» kezinde el boiynsha shamamen 1,15 milliard sapar kútilip otyr. Jergilikti BAQ jazǵandai, bul – qytai biligi statistikalyq málimetterdi jariialai bastaǵan sońǵy 18 jyldaǵy eń tómengi kórsetkish. Osylaisha, 2021 jyly «chýniýn» kezinde jolaýshylar aǵyny 2019 jylǵy deńgeiden 60%-ǵa tómendeidi (sol jyly kóliktiń barlyq túrimen 3 mlrd sapar jasaldy).
Qytaida Ai kúntizbesi boiynsha Jańa jyldy otbasymen birge atap ótý dástúrge ainalǵan, sondyqtan eldiń ár turǵyny osy ýaqytta týǵan jerine barýǵa tyrysady. Osyǵan bailanysty Qytaidyń kóktem merekesi eldiń búkil kólik júiesi úshin eń aýyr kezeńniń biri sanalady. Alaida biylǵy jyly koronavirýs pandemiiasyna bailanysty júris-turys aýqymy ádettegidei bolmaidy.
Eldegi saparlar sanynyń tómendeýine birneshe sebep bar. Qytai biliginiń kei óńirde koronavirýstyń órshýine jol bermeý sharalaryn qabyldady. Sonyń ishinde mindetti túrde COVID-19 testisin tapsyrý, birqatar jaǵdaida karantin jariialaý, sonmen qatar úkimettiń asa bir qajettilik bolmasa saparǵa shyqpaý jáne Jańa jyldy turǵylyqty jerlerde atap ótýge shaqyrýyna bailanysty.
