Koronavirýsqa qarsy otandyq vaktsina jeltoqsanda klinikalyq synaqtyń ekinshi satysynan ótedi. Bul týraly Densaýlyq saqtaý ministri Aleksei Tsoi málim etti, dep habarlaidy QazAqparat.
«Koronavirýsqa qarsy vaktsinany jasaý jumystary qarqyndy júrgizilýde. Biz bul baǵytta resýrstarymyzdy barynsha paidalanyp, naryqta qoljetimdi vaktsina jasaýǵa umtylýdamyz. Tirkelgenin jariialaǵan alǵashqy vaktsina – reseilik vaktsina boldy. Memleket basshysy Qazaqstanda osyndai zaýytty salyp, óndiristik qýattylyqty jolǵa qoiý tapsyrmasyn júktegen bolatyn. Bul - óte mańyzdy sharýa. Sebebi halyqtyń vaktsinaǵa qoljetimdiligin jolǵa qoiýýymyz kerek. Zaýyt salynatyn alań aiqyndalýda. Zaýyt qazirgi farmatsevtikalyq zaýyttardyń janyndaǵy alańdarda salynýy múmkin. Qazir bul máseleni reseilik áriptestermen talqylaý ústindemiz», - dedi Aleksei Tsoi Ortalyq kommýnikatsiialar qyzmetinde ótken baspasóz máslihatynda.
Ministrdiń aitýynsha reseilik vaktsina synaqtyń úshinshi satysynda tur.
«Reseilik áriptesterimiz vaktsina synaǵynyń qorytyndysyn taiaýda jariialaýǵa ýáde berip otyr. Bul vaktsinanyń alǵashqy jáne ekinshi fazasy oń nátijesin kórsetken. Qazirgi ýaqytta – reseilik vaktsinany áleýetti vaktsinanyń biri retinde kórip otyrmyz», - dedi ol.
Aleksei Tsoi áitse de úlken úmit – qazaqstandyq vaktsinaǵa artylyp otyrǵanyn aitady. Otandyq vaktsina osy jyldyń jeltoqsanynda klinikalyq synaqtyń ekinshi satysynan ótedi. Qazaqstandyq vaktsina zaýyty salynyp jatyr.
Ministr sonymen qatar qytailyq, amerikalyq vaktsinalardy da baqylanyp, zerttelip jatqanyn aitady. Biraq bul elderdiń vaktsinalary óz elderinde resmi túrde tirkelmegen.
