DSM sanitarlyq-epidemiologiialyq baqylaý komitetiniń tóraǵasy Aijan Esmagambetova koronavirýspen aýyratyn naýqastardyń, simptomsyz jáne bailanysta bolǵandardyń karantinin qysqartý týraly pikir bildirdi, dep habarlaidy QazAqparat.
«Qazirgi ýaqytta Resei karantindi 7 kúnge deiin qysqartatyndaryn málimdedi. Qazaqstanda mundai másele qarastyrylyp jatyr ma?», - dep suraq qoidy jýrnalist Ortalyq kommýnikatsiialar qyzmetinde.
«Iá, biz juma kúni áriptesterimizben ZOOM-kezdesý ótkizdik, halyqaralyq tájiribeni zerttedik. Shynynda da, álemde qazir karantin merzimi qysqaryp keledi. Ázirge biz bas memlekettik dárigerdiń qaýly jobasyna bailanysta bolǵan jáne simptomsyz adamdar 10 kúnge deiin karantinde bolady dep engizýdi qarastyryp otyrmyz», - dedi Aijan Esmaǵambetova.
Spiker jetinshi táýlikte testileý ótkizip, teris nátije bolǵan jaǵdaida 7 kúnnen keiin karantindi aiaqtap, jumysqa shyǵý quqyǵy beriletinin aitty.
«Eger testileý qandai da bir sebeptermen ótkizilmese, tipti testileý jasaǵysy kelmeitin azamattar bar, olar karantinniń aiaqtalýyn kútedi. Olar úshin karantin 10 kún boiy saqtalady. Iaǵni, 10 kúnnen keiin olar PTR-test tapsyrmai, karantindi aiaqtap, jumysqa shyǵa alady», - dep naqtylady komitet tóraǵasy.
Aita keteiik, qazirgi ýaqytta naýqastar úshin karantin merzimi 14 kúndi quraidy.
