Koronavirýs infektsiiasyn juqtyrǵan burynǵy vitse-ministr Kamaljan Nadyrovta aýrý jeńil formada ótip jatyr. Bul týraly QR Densaýlyq saqtaý ministrliginiń resmi ókili Dias Ahmetshárip aityp berdi, dep habarlaidy QazAqparat.
«Keshe Kamaljan Talǵatuly Úkimet sheshimimen vitse-ministr laýazymynan bosatyldy jáne Almaty qalasynyń basqarma basshysy qyzmetine kirisýi kerek edi. Ókinishke qarai, keshke onyń densaýlyǵy syr berip, koronavirýske analiz tapsyrdy. Analiz oń nátije kórsetip, K. Nadyrov Nur-Sultan qalasynyń infektsiialyq stantsionaryna jatqyzyldy. Qazir jaǵdaiy jaman emes, aýrý jeńil formada ótýde. Eki aptada emdelip shyǵyp, jańa qyzmetine kirisedi dep úmittenemiz», - dedi Dias Ahmetshárip.
Onyń aitýynsha, K.Nadyrovpen jaqyn jáne yqtimal bailanysta bolǵandar anyqtalyp jatyr. Epidemiologiialyq tekserý bastaldy.
«Sońǵy kúnderi Kamaljan Nadyrov ministrdiń tapsyrmasymen Almaty oblysynda boldy. Almaty qalasynda emhanadan aýrý oshaǵy shyǵyp, dárigerlerdiń arasynda túsinispeýshilik týǵanda da, K. Nadyrov barǵan edi. Árine, qorǵanys kiimin kiip, barlyq talaptardy saqtady. Degenmen aýrýdyń kimnen, qai jerden juqqanyn anyqtaýymyz qajet. Ol kisi qazir qai kúni qaida bolǵanyn, kimmen kezdeskenin tizbektep jazyp otyr. Bailanysta bolǵan barlyq adamdarǵa PTR arqyly diagnostika jasalady», - dedi resmi ókil.
Aita ketsek, Densaýlyq saqtaý vitse-ministri bolǵan Kamaljan Nadyrov koronavirýs infektsiiasyn juqtyryp, aýrýhanaǵa jatqyzyldy. Otstavkaǵa ketý týraly ótinish bildirgen Almaty Qoǵamdyq densaýlyq saqtaý basqarmasynyń basshysy Tileýhan Ábildaev ázirge óz qyzmetin jalǵastyra turady.
