Eýropa elderinde koronavirýstan bolǵan ólim-jitim azaiyp jatyr. Sondyqtan kei elder karantin sharalaryn jumsarta bastaidy, dep habarlaidy VVS agenttigi.
Italiia premer-ministri Djýzeppe Konti 4 mamyrdan bastap elde keibir shekteýler ishinara alynyp tastalatynyn málimdedi. Onyń aitýynsha, tamaqtanatyn oryndar men meiramhanalar tamaq sata alady, qazir olarǵa tek úige tapsyrys berýge ruqsat etilgen.
Italiialyqtar burynǵysynsha eldiń aýmaǵynda saiahattai almaidy, biraq olarǵa qaladan qalaǵa bir provintsiia sheginde barýyna ruqsat etiledi. Týǵan-týystaryna shaǵyn toppen tek maska kiip barýy kerek. Sondai-aq saiabaqtar da ashylady, biraq onda kóp adamnyń jinalýyna tyiym salynady.
AQSh-ta barlyq shtat juma kúni elde aýyrǵandar sany kún sanap artqanyna qaramastan, karantin sharalaryn jumsarta bastady. Amerika Qurama Shtattarynda Covid-19 juqtyrý men odan qaitys bolý jaǵdailary álemniń basqa elderine qaraǵanda kóbirek: sońǵy málimet boiynsha 957 myń adam koronavirýs juqtyrsa, 54,4 myń adam qaitys bolǵan.
Osy aptada Djordjiia, Oklahoma, Aliaska jáne Ońtústik Karolina karantindi ishinara jeńildetýge kóshti. Olar kelesi aptada shekteýlerdi odan ári alyp tastaýǵa shaqyrdy.
AQSh-taǵy koronavirýs indetine qarsy kúres jónindegi Aq úidiń úilestirýshisi, doktor Debora Birks jýrnalisterge karantin sharalarynyń bir bóligi elde jaqyn arada birneshe aiǵa deiin saqtalatynyn rastady.
