Densaýlyq saqtaý vitse-ministri Oljas Ábishev koronavirýs juqtyrǵan azamattarmen tikelei bailanysta bolǵan azamattardyń úileri belgilengen kartanyń ne úshin kerektigin túsindirip berdi, dep habarlaidy "Ult aqparat".
Aita keteiik, 22 naýryzda eGov.kz elektrondyq úkimet portalynda elimizde koronavirýstyń taralýyn, onyń ishinde halyq úshin qaýipti aimaqtardy kórsetetin karta paida bolǵan edi. Oljas Ábishev bul kartanyń ne úshin jasalǵanyn aitty.
«Biz osy kartany Ulttyq aqparattyq tehnologiialar ortalyǵymen jáne Tsifrlyq damý, innovatsiialar jáne aeroǵarysh ónerkásibi ministrligimen birlese otyryp iske qostyq. Joba aldynda álemniń Qytai, Singapýr, Koreia sekildi elderiniń tájiribesin zerttedik. Ol elder koronavirýstyń taralýyn tolyǵymen toqtatyp, jaǵdaidy baqylaýda ustap otyr. Onyń birinshi sebebi – atalǵan memleketter azamattardyń uialy telefondary arqyly qai jerde ornalasqanyn elektrondy túrde baqylaý arqyly qol jetkizdi. Halyqtyń qaýipsizdigi úshin biz osy tájiribeni elge engizdik. Sebebi koronavirýs adamnan adamǵa ǵana emes, ustaǵan telefony, esiktiń tutqasy nemese lifttiń batyrmasy arqyly tarai beredi. Aǵash nemese tsement bolsyn – 24 saǵatqa deiin sol jerde qala beredi», - dedi Oljas Ábishev Densaýlyq saqtaý ministrliginiń Facebook-paraqshasynda shyqqan suhbatynda.
Iaǵni sol kartada kórsetilgen úige barsańyz baiqaýyńyz kerek. Densaýlyq saqtaý ministrligi azamattarǵa osylaisha aldyn ala habarlap, kartadaǵy úige baratyn bolsa, abailaý kerektigin eskertedi.
«Karta ár saǵat saiyn jańaryp turady. Bul kartany jasaýǵa 45 adam jumyldyryldy. Al eger karantinde bolǵan adam 14 kúnnen keiin karantinnen shyqsa kartadaǵy núkte avtomatty túrde joiylyp ketedi», - dedi ol.
