Áleýmettik jelide Nazarbaevtar áýletine qatysty delingen jańa toidyń kadrlary tarady. Jeli qoldanýshylary videolar marqum Bolat Nazarbaevtyń uly Muhammedtiń súndet toiyna orai uiymdastyrylǵan kókpardan túsirilgenin jazyp jatyr, dep habarlaidy ult.kz.

Jelide jariialanǵan málimetterge súiensek, ulttyq at sporty uiymdastyrylǵan jiynǵa Nazarbaevtar áýletiniń birqatar týysy barǵan. Jazbalarda Qazaqstannyń tuńǵysh prezidenti Nursultan Nazarbaevtyń qaryndasy Ánipa Nazarbaevanyń da esimi atalady.

Degenmen saltanattyń naqty qai jerde ótkeni, oǵan kimderdiń qatysqany jáne kókparǵa qandai júldeler tigilgeni týraly tolyq aqparat joq. Bul málimetter ázirge resmi túrde nemese birneshe táýelsiz derekkóz arqyly rastalmaǵan.

Muhammed Bolatuly Nazarbaev — 2023 jyly ómirden ótken Bolat Nazarbaevtyń balalarynyń biri. Ashyq derekterde jariialanǵan muragerlik is materialdaryna sáikes, ol 2021 jylǵy 21 qyrkúiekte dúniege kelgen. Biyl Muhammed bes jasqa toldy.

Bolat Nazarbaev qaitys bolǵannan keiin onyń murasyna qatysty iste jubaiy men balalarynyń esimderi atalǵan. Sol materialdarda Muhammed te muranyń mindetti úlesine úmitker balalardyń qatarynda kórsetilgen.

Aita keteiik, qyrkúiek aiynda Nursultan Nazarbaevtyń uly shańyraq kóterdi.

Bolat Nazarbaev kim bolǵan?

Bolat Ábishuly Nazarbaev - kásipker, Qazaqstannyń tuńǵysh prezidenti Nursultan Nazarbaevtyń týǵan inisi. Ol 1953 jylǵy 23 naýryzda Almaty oblysynyń Shamalǵan aýylynda dúniege kelgen.

Eńbek jolyn Shamalǵandaǵy keńsharda mehanik bolyp bastaǵan. Keiin aǵa mehanik, brigadir jáne keńshar direktorynyń orynbasary qyzmetterin atqardy. 1988–1989 jyldary Qaskeleńdegi nan zaýyty direktorynyń orynbasary boldy. Keiin kásipkerlikke aýysyp, 1992–1997 jyldary «Inkar Agro» JShS vitse-prezidenti, al 1997 jyldan BN Invest holdinginiń direktory qyzmetin atqarǵan.

Bolat Nazarbaev qaiyrymdylyqpen de ainalysyp, «Saliqaly urpaq» qoǵamdyq qoryn qurǵan. Ashyq derekterde qordyń Qyzylaǵashtaǵy sý tasqynynan zardap shekkenderge úi salýǵa, Maqtaaraldaǵy qalpyna keltirý jumystaryna jáne meditsina qyzmetkerlerine qarjylai kómek kórsetkeni jazylǵan.

2022–2023 jyldary Bolat Nazarbaevpen jáne oǵan bailanysty kompaniialarmen bailanysty birqatar múlik pen jer telimderi sot pen memlekettik organdardyń nazaryna ilikti. Máselen, onyń kompaniialaryna qatysty Mańǵystaý men Jambyl oblystaryndaǵy júzdegen myń gektar jer memleketke qaitarylǵany, sondai-aq Almaty aýyr mashina jasaý zaýytynyń aktsiialaryna qatysty sot sheshimi shyqqany habarlanǵan.

Bolat Nazarbaev 2023 jylǵy 13 qarashada Almatyda uzaqqa sozylǵan dertten keiin 70 jasynda qaitys boldy. Onyń qazasyn Ortalyq klinikalyq aýrýhana resmi rastaǵan.