Qorǵanys ministri Aidos Myrzahmetov Aqmola garnizonyna qarasty áskeri bólimderdiń birine aldyn ala eskertýsiz baryp, tosyn tekserý júrgizdi, dep habarlaidy ult.kz.
Ministr áskeri bólimdegi kúndelikti qyzmettiń uiymdastyrylý barysymen, áskeri qyzmetshilerdiń ornalasý jáne turmys jaǵdaiymen tanysty. Sondai-aq bólim aýmaǵyndaǵy nysandardy aralap, infraqurylymnyń qazirgi jai-kúiin baǵalady.
Tekserý barysynda kazarmalardyń jaǵdaiyna, áskeri qyzmetshilerge jasalǵan áleýmettik-turmystyq jaǵdaiǵa jáne bólim infraqurylymynyń talapqa sai bolýyna erekshe nazar aýdaryldy.
Sapar qorytyndysy boiynsha Qorǵanys ministri anyqtalǵan máselelerdi joiý jáne áskeri qyzmetshilerdiń turmys sapasyn jaqsartý jóninde jaýapty tulǵalarǵa naqty tapsyrmalar berdi.
Aidos Myrzahmetov kim?
Aidos Sákenuly Myrzahmetov - Qazaqstan Respýblikasynyń Qorǵanys ministri, general-maior. Ol bul qyzmetke 2026 jylǵy 27 qyrkúiekte Memleket basshysynyń Jarlyǵymen taǵaiyndalǵan.
Myrzahmetov 1981 jylǵy 12 tamyzda Almaty oblysynyń Jambyl aýdanynda dúniege kelgen. 2002 jyly Qazaqstan Qarýly Kúshteriniń Áskeri akademiiasyn úzdik támamdaǵan. Keiin ulttyq qaýipsizdik jáne memlekettik kúzet júiesinde jedel ári komandalyq daiarlyq kýrstarynan ótken. 2025 jyly Ulttyq qorǵanys ýniversitetin bitirgen.
Ol uzaq jyldar boiy Qazaqstannyń Memlekettik kúzet qyzmetinde ofitserlik, komandalyq jáne basshylyq laýazymdarda qyzmet atqarǵan. 2024 jylǵy qańtarda Qarýly Kúshterdiń Arnaiy operatsiialar kúshteriniń qolbasshysy bolyp taǵaiyndaldy. Áskeri qyzmetke 20 jyldan astam ýaqytyn arnaǵan.
2022 jyly II dárejeli «Aibyn» ordenimen marapattalǵan. 2026 jyly general-maior áskeri ataǵyn alǵan. Resmi ómirbaianynda úilengeni jáne úsh balasy bar ekeni kórsetilgen.
Aidos Myrzahmetov Kaspiide oqý-jattyǵý kezinde 14 sarbazdyń qazasynan keiin bul qyzmetke taǵaiyndaldy.
