Qazaqstan halqynyń qaýipsizdigin qamtamasyz etý jónindegi sharalar týraly Bas memlekettik sanitariialyq dárigerdiń jańa qaýlysy jariialandy, dep habarlaidy "Ult aqparat".
Qaýlyǵa sáikes, QR SIM shaqyrýymen Qazaqstanǵa keletin shet memleketterdiń jáne halyqaralyq uiymdardyń resmi delegatsiia músheleri, QR-da akkredittelgen diplomatiialyq ókildikterdiń, konsýldyq mekemelerdiń jáne halyqaralyq uiym ókildikteriniń qyzmetkerleri jáne olardyń otbasy músheleri, áýe kompaniialardyń ushqyshtary jáne lokomotiv brigadalarynyń músheleri, temirjol kóligindegi tasymaldaý qyzmetimen bailanysty adamdar, júkterdi halyqaralyq avtomobilmen tasymaldaýdy júzege asyratyn júrgizýshiler, sondai-aq EAEO elderinen jáne Ózbekstannan Qazaqstan arqyly temirjol kóliginde jáne avtoótpe joldarynda ótkizý pýnktteri arqyly kelgen adamdardy qospaǵanda Qazaqstanǵa shetelden keletin barlyq adamdar COVID-19-ǵa zerthanalyq tekserý júrgizý úshin karantindik statsionarda 2 táýlikke oqshaýlanady.
«COVID-19 aýrýyn joqqa shyǵarmaityn belgileri bar adamdar karantindik statsionarǵa emes, provizorlyq statsionarǵa jatqyzylady. COVID-19-ǵa zerthanalyq tekserý nátijelerin alǵannan keiin oń nátijeli adamdar emdeý úshin infektsiialyq statsionarǵa aýystyrylady. COVID – 19-ǵa teris nátijeli adamdar 12 táýlik boiy úi karantininde oqshaýlanady. Úide oqshaýlaýǵa jaǵdai bolmaǵan kezde jergilikti atqarýshy organdar aiqyndaǵan úi-jailarda oqshaýlaý usynylady», - delingen qaýlyda.
Sonymen qatar Qazaqstanǵa shetelden kelgen diplomatiialyq ókildikterdiń, konsýldyq mekemeler men halyqaralyq uiym ókildikteriniń qyzmetkerleri jáne olardyń otbasy músheleri COVID-19-ǵa zerthanalyq tekserýge jáne 14 táýlik boiy úide ózin-ózi oqshaýlaýǵa (úi karantini) jatady.
«Shetelden kelgen áýe kompaniialardyń ushqyshtary men lokomotiv brigadalarynyń músheleri, temirjol kóliginde tasymaldaý qyzmetimen bailanysty adamdar jáne júkterdi halyqaralyq avtomobilmen tasymaldaýdy júzege asyratyn júrgizýshiler qońyraý shalý arqyly (múmkindiginshe video qońyraý shalý) turǵylyqty (kelgen) jeri boiynsha meditsinalyq baqylaýǵa jatady. EAEO elderinen jáne Ózbekstan Respýblikasynan Qazaqstan Respýblikasynyń memlekettik shekarasy arqyly temirjol kóliginde jáne avtoótpe joldarynda ótkizý pýnktteri arqyly kelgen adamdar 14 táýlik boiy úide (úi karantini) oqshaýlanady», - delingen qaýlyda.
Qaýlyǵa sáikes densaýlyq saqtaý uiymdarynda, jergilikti atqarýshy organdar karantin úshin aiqyndaǵan úi-jailarda, sondai-aq meditsina qyzmetkerleri úide meditsinalyq kómek kórsetý, oshaqta epidemiologiialyq tergep-tekserý júrgizý, naýqastardan jáne bailanysta bolǵan adamdardan suraý jáne saýalnama alý kezinde aýdio, foto jáne beine túsirilim júrgizýge tyiym salyndy.
