Batys Qazaqstan oblysynda COVID-19 indetimen kúresken meditsina qyzmetkerlerine 2,8 milliardtan astam teńge tólendi, dep habarlaidy "Ult aqparat".
BQO Densaýlyq saqtaý basqarmasynan málim etkenindei, epidemiologiialyq sharalarǵa atsalysqan jáne naýqastarmen jumys istegen qyzmetkerlerge áleýmettik tólemaqy jáne ústemeaqy tóleý jalǵasýda.
Kúni búginge deiin 687 qyzmetkerge qatysty materialdy komissiia qarap, sonyń 480-i qoldaý tapty. 478 adam ózderine tiesili qarajatty aldy. Ekeýiniń aryzy Memlekettik áleýmettik saqtandyrý qorynda qaralý ústinde.
Al 207 meditsina qyzmetkeriniń ótinishi qanaǵattandyrylmady. Negizgi sebepteri: olardyń koronavirýsqa qarsy sharalarǵa qatyspaýy, jumys kezeńiniń indettiń taralý ýaqytymen sáikes kelmeýi, dertti juqtyrýǵa sebep bolǵan sanitarlyq-epidemiologiialyq talaptardy saqtamaýy.
Óńirde indet juqtyrǵan 4 meditsina qyzmetkeri kóz jumdy. Olardyń otbasylaryna tiisti qarjy tolyqtai tólendi.
Biylǵy naýryz-qyrkúiek aralyǵynda oblysta 1490 dáriger, 5480 orta býyn, 1962 kishi býyn qyzmetkeri, 973 jedel járdem júrgizýshisine barlyǵy 2 817,7 mln teńge tólendi.
