BQO-da koronavirýs juqtyrǵan sońǵy úsh naýqas – Atyraý oblysynyń Teńiz ken ornynda vahtalyq ádispen jumys jasaityn óńir turǵyndary, dep habarlaidy "Ult aqparat".
BQO ákimdigi málim etkenindei, olardyń bári de – 22, 23 jáne 24 jastaǵy jastar.
Búgin sondai-aq tańerteń 12 naýqas anyqtalǵan bolatyn. BQO taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Nurlybek Mustaevtyń aitýynsha, bulardyń jeteýi – meditsina qyzmetkeri, olar buryn aýyrǵan áriptesterimen qarym-qatynasta bolyp, karantindik statsionarǵa jatqyzylǵan.
Qalǵan bes adam – Reseiden kelgen Qazaqstan azamattary. Ekeýi – Túrkistan, bireýi – Batys Qazaqstan oblysynyń, ekeýi – Shymkent qalasynyń turǵyndary. Olar Saratov jáne Samara oblystarymen shektesetin «Tasqala» men «Syrym» avtoótkelderinen ótken kezde jedel járdemmen statsionarǵa jetkizilgen.
Zertteý qorytyndysymen 15 adamda COVID-19 diagnozy naqtylanyp, oblystyq juqpaly aýrýlar aýrýhanasyna ornalastyryldy.
Naýqastarmen qarym-qatynasta bolǵandar meditsinalyq baqylaýǵa alynyp, aýrý oshaqtarynda dezinfektsiialyq jumystar júrgizildi.
Óńirde epidemiiaǵa qarsy kúres jalǵasýda.
Osylaisha BQO-da aýyrǵandar sany 189-ǵa jetti, sonyń bireýi – bala.
Oblystyq densaýlyq saqtaý basqarmasynyń basshysy Bolatbek Qaiýpovtyń málim etkenindei, 31 adam jazylyp shyqsa, sonyń ekeýi – meditsina qyzmetkeri.
«Qazirgi kezde oblystyq juqpaly aýrýlar aýrýhanasynda 158 adam jatsa, sonyń 36-sy – meditsina qyzmetkeri. Sonyń jeteýi – dáriger, 12-si – medbike, 12-si – sanitar, tórteýi – býfetshi, bireýi – dezinfektor. Meditsina qyzmetkerleriniń 20-synda aýrý jeńil túrde ótýde, 14-iniń jaǵdaiy ortasha. Budan buryn oblystyq juqpaly aýrýlar aýrýhanasynda dárigerlerge baǵynbaityn birneshe emdelýshi bar ekendigin aitqan bolatynbyz. Olarǵa qatysty ákimshilik hattama toltyrylatyn bolady. Jalpy, oblysta koronavirýs juqtyrǵandardyń 80 paiyzy – Reseiden kelgender. Aýrýdy erte anyqtap, der kezinde emdeýdiń nátijesinde indet oblystyń ishine taralmai otyr», dedi B.Qaiýpov.
Eske sala keteiik, budan buryn BQO-da birden 17 adamnyń jazylyp shyqqanyn, Batys Qazaqstanda sońǵy tirkelgen 10 naýqastyń bári de Reseiden kelgenin jazǵan bolatynbyz.
