Batys Qazaqstan oblysynda koronavirýs juqtyrǵan sońǵy 4 naýqastyń úsheýi Reseiden kelgen, dep habarlaidy "Ult aqparat".
BQO ákimdiginen túsken málimetke qaraǵanda, olar – 1998, 1990 jáne 1977 jylǵy oblys turǵyndary.
Reseimen shektesetin «Syrym», «Aqsai» avtoótkelderinen ótken kezde bireýinen basqasynda densaýlyqtaryna shaǵymy bolmaǵan. Áitse de algoritmge sáikes jedel járdemmen karantindik statsionarǵa jatqyzylyp, zerthanalyq synama alynǵanda, koronavirýs anyqtaldy.
Aýrý juqtyrǵan 4 adamnyń biri – Atyraý oblysyndaǵy Teńiz ken ornynda jumys jasaityn 1999 jylǵy turǵyn.
Olardyń barlyǵy oblystyq juqpaly aýrýlar aýrýhanasyna ornalastyryldy.
Naýqastarmen qarym-qatynasta bolǵandar meditsinalyq baqylaýǵa alynyp, aýrý oshaqtarynda dezinfektsiialyq jumystar júrgizildi.
Osylaisha BQO-da aýyrǵandar sany 198-ge jetip, sonyń 36-sy saýyǵyp shyqty.
