Ázerbaijanda koronavirýs juqtyrýdyń 76 jańa oqiǵasy tirkeldi, indetten bir adam qaitys bolǵan, - dep habarlaidy Trend agenttigi.
Eldiń ministrler kabineti janyndaǵy Jedel shtabtyń habarlaýynsha, koronavirýs juqtyrǵan 1953 jylǵy azamattyń densaýlyǵyn jaqsartýǵa baǵyttalǵan sharalar nátijesin bermegen. Qazir onyń otbasy músheleri, sondai-aq, ol bailanysta bolǵan basqa adamdar anyqtalýda.
Elde indetke shaldyǵýdyń 717 oqiǵasy tirkelgen, sonyń ishinde 44 adam jazylyp, segiz adam kóz jumǵan. Erekshe rejimdegi aýrýhanalarda 665 adam em qabyldap jatyr. Sonyń ishinde 23 adamnyń jaǵdaiy aýyr, 31 adamnyń jaǵdaiy – ortasha aýyr, qalǵandary ózderin qalypty sezinýde.
Aýrý juqtyrý faktisin anyqtaý úshin barlyǵy 53 300 test jasaldy.
