2020 jyldyń naýryzynan qarashaǵa deiingi KVI-ge qarsy kúreske qatysqan Almatynyń 8 myń meditsinalyq qyzmetkeri turaqty jalaqylaryna qosymsha ústeme aqy aldy, dep habarlaidy "Ult aqparat".
Koronavirýs pandemiiasy bastalǵaly Almatynyń Qoǵamdyq densaýlyq basqarmasyna qarasty meditsina uiymdarynyń 8 myńǵa jýyq qyzmetkerine 15 142 760,1 myń teńge kóleminde ústeme aqy tólendi.
Ústeme aqynyń mólsheri dárigerlerdiń qandai aimaqta jumys jasaǵanyna bailanysty boldy. QR Densaýlyq saqtaý ministrliginiń buiryǵyna sáikes, tólemderdi berý 3 táýekel toptary boiynsha júzege asyryldy.
Birinshi táýekel tobyna (óte joǵary) - juqpaly aýrýlar statsionarlarynyń dárigerleri, orta jáne kishi meditsina qyzmetkerleri, COVID-19 naýqastaryna meditsinalyq kómek kórsetýge qatysqan jansaqtaý bólimderiniń jáne basqa da statsionarlar qyzmetkerleri jatqyzyldy.
Osy táýekel tobyndaǵy bir qyzmetkerge beriletin ústeme aqy kólemi eń tómengi ailyqtyń jiyrma eselengen mólsherinen asqan joq. Osy toptaǵylarǵa jalpy somasy 6 795 746,1 myń teńge tólendi.
Ekinshi táýekel tobyna (joǵary) – provizorlyq statsionarlardyń, provizorlyq bólimderdiń dárigerleri, orta jáne kishi meditsina qyzmetkerleri, jedel meditsinalyq kómektiń dárigerleri men feldsherleri, onyń ishinde ambýlatoriialyq jaǵdaida meditsinalyq kómek kórsetetin densaýlyq saqtaý uiymdarynyń qyzmetkerleri endi.
Bul táýekel tobyndaǵy bir qyzmetkerge beriletin ústeme aqy kólemi eń tómengi jalaqynyń on eselengen mólsherinen aspady. Atalǵan topqa tólengen ústeme aqynyń jalpy somasy – 6 223 334,0 myń teńge.
Úshinshi táýekel tobynda (ortasha) - karantindik statsionarlardyń dárigerleri, orta jáne kishi meditsina qyzmetkerleri, jedel meditsinalyq kómek brigadasynyń júrgizýshileri, onyń ishinde ambýlatoriialyq jaǵdaida meditsinalyq kómek kórsetetin densaýlyq saqtaý uiymdarynyń qyzmetkerleri boldy.
Onda bir qyzmetkerge beriletin ústem aqy mólsheri eń tómengi jalaqynyń bes eselengen mólsherinen aspady. Osy toptaǵylarǵa jalpy somasy 2 123 680,0 myń teńge kóleminde ústem aqy tólendi.
