Almatyda koronavirýsqa shaldyqqan naýqastardy emdeýge arnalǵan jańa modýldik aýrýhananyń qurylysy bastaldy. Bul týraly Instagram-paraqshasynda qala ákimi Baqytjan Saǵyntaev jazdy, dep habarlaidy "Ult aqparat".
«COVID-19-ǵa qarsy is-qimyl, sharalar aiasynda oryn sanyn arttyryp, qýattylyqty kúsheitýdi jalǵastyramyz. Bul rette 300 tósek-orynǵa arnalǵan (onyń 30-y reanimatsiialyq) ekinshi modýldik juqpaly aýrýlar aýrýhanasynyń qurylysy bastaldy. Meditsinalyq mekeme meditsinalyq gaz júiesimen, sondai-aq KT, ÝDZ jáne rentgen apparattarymen qamtamasyz etilmek», - dedi ákim.
B.Saǵyntaevtyń aitýynsha, gospital tolyǵymen tsifrlyq negizde, iaǵni tekserý - bailanyssyz ádispen, al baqylaý beinebailanys arqyly júrgiziledi. Avtomattandyrylǵan júie naýqastyń jaǵdaiyn jedel baqylaýǵa, sondai-aq «jasyl» jáne «qyzyl» aimaqtar boiynsha qyzmetkerlerdiń qozǵalysyn baqylaýǵa múmkindik beredi.
Aita ketý kerek, bul Almatydaǵy ekinshi gospital bolmaq. Birinshisi 18 kúnde salynyp, 24 sáýirde paidalanýǵa berilgen bolatyn.
