Almaty ákimi Baqytjan Saǵyntaevtyń tapsyrmasymen qalada pandemiianyń yqtimal jańa tolqynyna daiyndyqty qamtamasyz etý boiynsha sharalar qabyldanyp jatyr, dep habarlaidy "Ult aqparat".
Qalanyń densaýlyq saqtaý júiesiniń aldynda KVI boiynsha epidemiialyq jaǵdai asqynǵan kezde naýqastar men virýs tasymaldaýshylarynyń barynsha ýaqtyly meditsinalyq kómekpen jedel qamtý mindeti qoiyldy.
Qala boiynsha 7011 tósek-oryn daiyndaldy. Onyń ishinde 250 oryn jansaqtaý bóliminde daiyndaldy. 23 COVID statsionary daiyndaldy. 2 jańa klinikanyń qurylysy aiaqtaldy. 500 tósek-orynǵa arnalǵan infektsiialyq gospital, 300 tósek-orynǵa arnalǵan jańa modýldi statsionar jasaqtaldy. Osylaisha sońǵy úsh aida infektsiialyq tósek-oryn sany eki ese kóbeidi.
Alǵashqy meditsina-sanitarlyq kómek jumysy kúsheitildi. Bul uiymdarynda «taza» jáne «las» aimaqtar qurylyp, aǵyndar bólindi. Epidemiiaǵa qarsy rejimdi, aimaqtarǵa bólýdiń saqtalýy boiynsha baqylaý kúsheitildi. 73 emhanada 298 mobildi brigada qyzmet etedi. Telemeditsina ortalyǵy quryldy.
Farmpreparattar jáne meditsinalyq ónimder boiynsha 10 mlrd teńgege turaqtandyrý qory jumys isteidi. Turaqtandyrý qorynyń sheńberinde 2021 jyldyń aqpanyna deiingi eseppen 68 ataý boiynsha dárilerdiń qajetti qory quryldy. 2021 jyldyń 31 qańtaryna deiin keminde 40 mln dana dári-dármek pen meditsinalyq ónimderdi jetkizý josparlanyp otyr. Qajet bolǵan jaǵdaida farmatsevtikalyq preparattardy naryqqa jetkizý úshin paidalanylatyn 8 mln dana dáriniń tómendetilmeitin eń az qory saqtaldy. Sonymen birge qalada dárihanalarǵa kún saiyn dárilik preparattar men jeke qorǵanys quraldarynyń bar-joǵyna monitoring júrgiziledi.
Meditsina qyzmetkerlerdiń qaýipsizdigi men daiyndyǵyna erekshe nazar aýdarylǵan. Jeke qorǵanys quraldarynyń eki ailyq qory jasalǵan. Qalada meditsinalyq betperdelerdi shyǵaratyn 6 iri otandyq óndirýshi bar. Óndiris qýaty — 882 myń maska.
Densaýlyq saqtaý uiymdaryn meditsinalyq mamandarmen qamtamasyz etýge erekshe kóńil bólinip jatyr. Epidemiiaǵa qarsy sharalarǵa jumyldyrylǵan meditsina qyzmetkerlerinen bólek, 2450 mamannan quralǵan kadrlyq rezerv daiyndaldy. Sonymen birge, meditsinalyq joǵary oqý oryndarynyń oqytýshylary, rezidentteri, dáriger-internderinen rezerv quryldy.
43,1 mlrd teńge somasyna klinikalardy meditsinalyq jabdyqtarmen jańartý jáne tolyq jaraqtandyrý júrgizildi.
COVID-19 aldyn alý jelisi boiynsha zerthanalardyń daiyndyǵy qamtamasyz etildi. Qalada 18 PTR zerthanasy bar. Olarda táýligine 14 050 zertteý júrgiziledi. Sonymen birge, táýligine 1152 zertteý qýattylyǵy bar 12 IFT zerthanasy qyzmet etedi.
