Koronavirýs pandemiiasynyń ekinshi tolqynyna daiyndyq sheńberinde Almatyda birneshe gospital ashylady. Bul týraly Almaty qalasynyń ákimi Baqytjan Saǵyntaev málim etti, dep habarlaidy QazAqparat.
«Búgingi kúni kovidpen kúreske 27 meditsina uiymy tartylǵan. Jalpy tósek qory 6096 oryndy quraidy. Tósek-oryndardyń bos bolmaýy 90 paiyzdan 50%-ǵa deiin azaidy. Búgingi málimet boiynsha bul kórsetkish 42%-ǵa tómendedi. Pandemiianyń ekinshi tolqynyna daiyndyq sheńberinde jaǵdaiy aýyr naýqastarǵa arnalǵan birinshi eshelon statsionarlaryndaǵy infektsiialyq tósek oryndaryn 1015 orynǵa kóbeitemiz», - dedi Almaty ákimi Úkimet otyrysynda.
Sonymen birge, tamyz aiynyń sońyna deiin 500 orynǵa arnalǵan jańa gospital paidalanýǵa beriledi.
«Al qyrkúiektiń ortasyna deiin 300 tósek-orynǵa arnalǵan tez salynatyn taǵy bir modýldik infektsiialyq gospitaldy iske qosamyz. Kelesi aptanyń basynda qurylys alańyna shyǵamyz. 1 qazanǵa deiin eki qonaq úidiń bazasynda jeke investitsiialar esebinen 215 tósek-oryndyq tolyqqandy kovidtik emhanalar qurylatyn bolady. Tamyzdyń sońyna deiin patologoanatomiialyq biýro iske qosylady», - dedi Baqytjan Saǵyntaev.
