Densaýlyq saqtaý vitse-ministri Ajar Ǵiniiat KVI boiynsha Qazaqstanda sońǵy táýlikte 456 naýqas statsionarǵa jatqyzylǵanyn aitty, dep habarlaidy QazAqparat.
«Sońǵy táýlikte 456 naýqas statsionarǵa tústi. Jansaqtaý bóliminde aýyr jáne óte aýyr jaǵdaida 260 naýqas jatyr. Onyń ishinde 12 júkti áiel, bosanǵannan keiingi ana jáne bir bala bar. Osy patsientterdiń 72 paiyzy ókpeni jasandy jeldetý apparatyna qosylǵan. Sońǵy táýlikte 5 patsient jansaqtaý bóliminen ádettegi palatalarǵa jaǵdaiynyń jaqsarýyna bailanysty aýystyryldy. Jaǵdaiy aýyr naýqastardyń negizgi úlesi – Nur-Sultan jáne Almaty qalalaryna tiesili», - dedi Ajar Ǵiniiat OKQ-da ótken baspasóz máslihatynda.
Vitse-ministrdiń aitýyna qaraǵanda, Qazaqstanda KVI-dan jalpy 264 adam qaitys boldy.
«Olardyń jartysy úsh óńirde: Nur-Sultan, Almaty qalasy men Qaraǵandy oblysy. Sońǵy aptada ishinde 76 adam qaitys boldy. KVI-dan ólim jaǵdaiyn taldaýdy árbir óńirdegi oblystyq densaýlyq saqtaý basqarmalaryndaǵy komissiia júrgizedi. Qaitys bolǵan patsientterdiń negizgi úlesi – 50 jastan joǵary egde adamdar. Patsientterdiń 90 paiyzdan astamynda júrek-qantamyr, bronhy men ókpe júiesiniń sozylmaly aýrýlary, qant diabeti, semizdik, baýyr tsirrozy, obyr aýrýlary bolǵan. Derekterdi jinaý kezinde mundai adamdardyń shekteý nemese karantin jaǵdailaryn buzǵany, kópshilik ortalarda bolǵany anyqtaldy. Solaisha, aýrý juqtyrǵan. Jasy úlken jáne sozylmaly aýrýlary bara adamdardy óz densaýlyǵyna asa jaýapty bolýǵa shaqyramyn», - dedi ol.
