Qazaqstannyń halyq jazýshysy Qabdesh Jumadilov dúnieden ozdy. Qaraly habardy Qazaqstan Jazýshylar odaǵy men Mádeniet jáne sport ministrligi rastady.
"Iá, Qabdesh aǵa búgin ómirden ótti. Negizi júrek jetkiliksizdiginen qaitys boldy. Biraq ol kisi koronavirýspen jatty", - aqyn, Qazaqstan Jazýshylar odaǵy basqarma Tóraǵasynyń birinshi orynbasary Aqberen Elgezek.
Qabdesh Jumadilov 1936 jyly 24 sáýirde Shyńjań ólkesiniń Tarbaǵatai aimaǵy, Maldybai aýylynda dúniege kelgen. Aýylda bastaýysh bilim alyp, keiin Sháýeshek gimnaziiasyn bitiredi. 1956 jyly Qytai úkimetiniń joldamasymen Almatyǵa kelip, Qazaq memlekettik ýniversitetiniń filologiia fakýltetine oqýǵa túsedi. Alaida ýniversitettiń ekinshi kýrsynan keiin eki el arasyndaǵy saiasi jaǵdaiǵa bailanysty keri shaqyrylyp, 1958-1962 jyldar aralyǵynda Qytaida qýǵyn-súrginge ushyrady. 1962 jyly imperiia shekarasyn buzyp ótken qazaq kóshimen birge atamekenge qaityp oralyp, QazMÝ-degi aiaqtalmai qalǵan oqýyn qaita jalǵap, 1965 jyly bitirip shyǵady. "Qazaq ádebieti" gazetinde (1965-1967), "Jazýshy" baspasynda (1967-1976), Memlekettik baspalar komitetinde (1976-1981) jaýapty qyzmetter atqardy. 1981 jyldan biryńǵai shyǵarmashylyq jumysta bolǵan.
Jazýshynyń ádebi qyzmeti Sháýeshek gimnaziiasynda oqyp júrgende bastalǵan. 1954 jyly "Shyńjań gazetinde" alǵashqy óleńderi jaryq kórgen. "Jamal" atty tyrnaqaldy áńgimesi 1956 jyly "Shuǵyla" jýrnalynda basylǵan.
Jastyq shaqta jazylǵan óleńderi 1967 jyly "Jas dáýren" degen atpen jeke jinaq bolyp shyqqan. Osydan keiin jazýshy biryńǵai proza jazýǵa oiysqan. "Qazdar qaityp barady" atty alǵashqy áńgimeler jinaǵy 1968 jyly, "Kókeikesti" romany 1969 jyly jaryq kórdi. Romandarynyń deni tarihi taqyrypqa arnalǵan. Onyń eki kitaptan turatyn "Sońǵy kósh" (1974-1981), "Atameken" (1985), "Taǵdyr" (1988) romandary Shyńjań qazaqtarynyń ómirinen jazylǵan. "Sońǵy kósh" dilogiiasyna 1983 jyly M.Áýezov atyndaǵy ádebi syilyq, "Taǵdyr" romanyna 1990 jyly Abai atyndaǵy Memlekettik syilyq berilgen.
Osy oraida, Ult portalynyń ujymy qazaq jurtyna qadirli bolǵan kórnekti qalamgerdiń mezgilsiz dúnieden ozýyna bailanysty otbasy men týǵan-týystaryna qaiǵyryp kóńil aitady.
Marqumnyń jatqan jeri jaily, topyraǵy torqa bolsyn. Peiishte nury shalqyp, Jaratqan artyndaǵy urpaǵyna uzaq ǵumyr bersin!
