قازاقستاننىڭ حالىق جازۋشىسى قابدەش جۇمادٸلوۆ دٷنيەدەن وزدى. قارالى حاباردى قازاقستان جازۋشىلار وداعى مەن مەدەنيەت جەنە سپورت مينيسترلٸگٸ راستادى.
"يە, قابدەش اعا بٷگٸن ٶمٸردەن ٶتتٸ. نەگٸزٸ جٷرەك جەتكٸلٸكسٸزدٸگٸنەن قايتىس بولدى. بٸراق ول كٸسٸ كوروناۆيرۋسپەن جاتتى", - اقىن, قازاقستان جازۋشىلار وداعى باسقارما تٶراعاسىنىڭ بٸرٸنشٸ ورىنباسارى اقبەرەن ەلگەزەك.
قابدەش جۇمادٸلوۆ 1936 جىلى 24 سەۋٸردە شىڭجاڭ ٶلكەسٸنٸڭ تارباعاتاي ايماعى, مالدىباي اۋىلىندا دٷنيەگە كەلگەن. اۋىلدا باستاۋىش بٸلٸم الىپ, كەيٸن شەۋەشەك گيمنازيياسىن بٸتٸرەدٸ. 1956 جىلى قىتاي ٷكٸمەتٸنٸڭ جولداماسىمەن الماتىعا كەلٸپ, قازاق مەملەكەتتٸك ۋنيۆەرسيتەتٸنٸڭ فيلولوگييا فاكۋلتەتٸنە وقۋعا تٷسەدٸ. الايدا ۋنيۆەرسيتەتتٸڭ ەكٸنشٸ كۋرسىنان كەيٸن ەكٸ ەل اراسىنداعى ساياسي جاعدايعا بايلانىستى كەرٸ شاقىرىلىپ, 1958-1962 جىلدار ارالىعىندا قىتايدا قۋعىن-سٷرگٸنگە ۇشىرادى. 1962 جىلى يمپەرييا شەكاراسىن بۇزىپ ٶتكەن قازاق كٶشٸمەن بٸرگە اتامەكەنگە قايتىپ ورالىپ, قازمۋ-دەگٸ اياقتالماي قالعان وقۋىن قايتا جالعاپ, 1965 جىلى بٸتٸرٸپ شىعادى. "قازاق ەدەبيەتٸ" گازەتٸندە (1965-1967), "جازۋشى" باسپاسىندا (1967-1976), مەملەكەتتٸك باسپالار كوميتەتٸندە (1976-1981) جاۋاپتى قىزمەتتەر اتقاردى. 1981 جىلدان بٸرىڭعاي شىعارماشىلىق جۇمىستا بولعان.
جازۋشىنىڭ ەدەبي قىزمەتٸ شەۋەشەك گيمنازيياسىندا وقىپ جٷرگەندە باستالعان. 1954 جىلى "شىڭجاڭ گازەتٸندە" العاشقى ٶلەڭدەرٸ جارىق كٶرگەن. "جامال" اتتى تىرناقالدى ەڭگٸمەسٸ 1956 جىلى "شۇعىلا" جۋرنالىندا باسىلعان.
جاستىق شاقتا جازىلعان ٶلەڭدەرٸ 1967 جىلى "جاس دەۋرەن" دەگەن اتپەن جەكە جيناق بولىپ شىققان. وسىدان كەيٸن جازۋشى بٸرىڭعاي پروزا جازۋعا ويىسقان. "قازدار قايتىپ بارادى" اتتى العاشقى ەڭگٸمەلەر جيناعى 1968 جىلى, "كٶكەيكەستٸ" رومانى 1969 جىلى جارىق كٶردٸ. روماندارىنىڭ دەنٸ تاريحي تاقىرىپقا ارنالعان. ونىڭ ەكٸ كٸتاپتان تۇراتىن "سوڭعى كٶش" (1974-1981), "اتامەكەن" (1985), "تاعدىر" (1988) روماندارى شىڭجاڭ قازاقتارىنىڭ ٶمٸرٸنەن جازىلعان. "سوڭعى كٶش" ديلوگيياسىنا 1983 جىلى م.ەۋەزوۆ اتىنداعى ەدەبي سىيلىق, "تاعدىر" رومانىنا 1990 جىلى اباي اتىنداعى مەملەكەتتٸك سىيلىق بەرٸلگەن.
وسى ورايدا, ۇلت پورتالىنىڭ ۇجىمى قازاق جۇرتىنا قادٸرلٸ بولعان كٶرنەكتٸ قالامگەردٸڭ مەزگٸلسٸز دٷنيەدەن وزۋىنا بايلانىستى وتباسى مەن تۋعان-تۋىستارىنا قايعىرىپ كٶڭٸل ايتادى.
مارقۇمنىڭ جاتقان جەرٸ جايلى, توپىراعى تورقا بولسىن. پەيٸشتە نۇرى شالقىپ, جاراتقان ارتىنداعى ۇرپاعىنا ۇزاق عۇمىر بەرسٸن!
