Qazaq ádebieti men rýhaniiaty taǵy bir aýyr qaiǵyǵa dýshar boldy. 77 jasqa qaraǵan shaǵynda kórnekti aqyn, qabyrǵaly qalamger, Halyqaralyq "Alash" ádebi syilyǵynyń laýreaty Járken Bódeshuly dúnieden ozdy.
Bul týraly aqyn, Qazaqstan Jazýshylar odaǵy basqarma tóraǵasynyń birinshi orynbasary Aqberen Elgezek óziniń Facebook paraqshasynda habarlady.
"Qazaq ádebieti men rýhaniiaty taǵy da qara jamyldy. Sum ajal aramyzdan ǵalamat oishyl-aqyn, perishtedei aq kóńil adam Járken Bódeshulyn alyp ketti.
Barsha qazaqqa qaiǵyra kóńil aitamyn. Járken aǵamyzdyń rýhy beiishtiń tórinde shalqysyn. Alla aldynan jarylqasyn.
P.S. Járken Bódeshulymen qoshtasý jiyny erteń 23 sáýir kúni, saǵ. 10:00-de Almaty qalasy, Qulager yqsham aýdanynda, ózi turǵan úiiniń aldynda ótedi.Barshańyzdy qalyptasyp otyrǵan epidemiialogiialyq jaǵdaiǵa bailanysty qaýipsizdik sharalaryn qatań saqtaýǵa shaqyramyn" - dep jazdy ol.
Járken Bódeshuly 1944 jyly 15 mamyrda Qytai Halyq respýblikasynyń Tarbaǵatai aimaǵy Toly aýdanynda Jaiyr taýynda týǵan. Azan shaqyryp qoiǵan aty – Jarmuhammed.
QazMÝ-dyń jýrnalistika fakýltetin bitirgen.
Ár jyldary basylymdarda jáne kitap palatasynda jaýapty qyzmetter atqarǵan. Dúniejúzi qazaqtary qaýymdastyǵynda bólim meńgerýshisi bolǵan.
Aqynnyń "Kókshe quraq", "Qos qanat", "Zeiin", "Aspan daýsy", "Nurly boiaýlar", "Juldyzǵa ornyn ai bermes", "Emender túnde búrleidi" atty óleńder men poemalar jinaǵy jaryq kórgen.
Osy oraida, Ult portalynyń ujymy qazaq jurtyna qadirli bolǵan kórnekti qalamgerdiń mezgilsiz dúnieden ozýyna bailanysty onyń otbasy men týǵan-týystaryna qaiǵyryp kóńil aitady.
Marqumnyń jatqan jeri jaily, topyraǵy torqa bolsyn. Peiishte nury shalqyp, Jaratqan artyndaǵy urpaǵyna uzaq ǵumyr bersin!
