Qyzylorda oblysynda «Qorqyt atanyń danalyq sózderi» atty kitap oqyrman qaýymǵa jol tartty. Bul týyndy qazaq, orys jáne aǵylshyn tilderinde jaryq kórgen, dep habarlaidy "Ult aqparat".
Atalmysh igilikti is Tuńǵysh Prezident - Elbasy Nursultan Nazarbaevtyń «Bolashaqqa baǵdar: rýhani jańǵyrý» baǵdarlamasy aiasynda qolǵa alynǵan. Kitap Qyzylorda oblystyq «Rýhani jańǵyrý» ortalyǵynyń uiymdastyrýymen júzege asyryldy. Ony ortalyq qyzmetkeri, belgili túrkitanýshy, filologiia ǵylymdarynyń kandidaty Serikbai Qosan qurastyryp shyqty. Kitap úsh myń taralymmen oqyrman qolyna jol tartty.
Joba avtory qazaq tilindegi nusqasy professor B. Ysqaqovtyń aýdarmasy negizinde ázirlengenin aitady. Oǵan azdaǵan túzetýler engizilgen. Al orys tilindegi mátinine 1965 jyly «Kniga moego deda Korkýta» degen ataýmen jaryq kórgen akademik V.V.Bartoldtiń aýdarmasy negiz bolǵan. Aǵylshyn tilindegi nusqasy Ulttyq aýdarma biýrosy mamandarynyń kómegimen daiyndalǵan.
Ǵalymnyń aitýynsha, kitap mátini Bilim jáne ǵylym ministrligi Ǵylym komiteti Ortalyq ǵylymi kitaphanasynyń sirek qory men M.Áýezov atyndaǵy Ádebiet jáne óner institýtynyń qoljazba qorynda saqtalǵan materialdar negizinde jáne 1999 jyly jaryq kórgen «Qorqyt ata entsiklopediiasynda» jaryq kórgen nusqalar negizinde daiyndalǵan.
Oblystyq «Rýhani jańǵyrý» ortalyǵy jyl sońyna deiin aimaqtaǵy sakraldy muralar jaily kitap pen Syr súleii Turmaǵambettiń buryn esh jerde jariialanbaǵan jyrlarynan jinaq shyǵarýdy josparlap otyr.
