14 naýryz – Kórisý kúnine orai «Qazaqkontsert» memlekettik kontserttik uiymy «Kelkóriseiik» qaiyrymdylyq jobasyn ótkizedi, dep habarlaidy "Ult aqparat".
Is-shara sanitarlyq normalardyń tolyq saqtalýymen «Qazaqstan» ortalyq kontsert zalynda 14 naýryz kúni saǵat 11:00-de bastalady. «#Kelkóriseiik» qaiyrymdylyq jobasynyń áleýmettik mańyzy zor. Joba áleýmettik turǵydan osal jandar men az qamtylǵan kópbalaly otbasylarǵa qoldaý kórsetýge baǵyttalǵan. Joba aiasyndaǵy is-sharalar keshenin tamashalaýǵa áleýmettik turǵydan osal otbasylardan shyqqan 100 búldirshin shaqyrylǵan.
Bul merekeni balalardyń kóz qýanyshyna ainaldyrý maqsatynda búldirshinderge ulttyq taǵamdardan turatyn tátti syilyqtar jinaǵy (jent, qurt, irimshik) tabystalady. Sondai-aq merekelik kontsert ótip, «Astana sazy» memlekettik folklorlyq ansambli men «Halyq qazynasy» bóliminiń ártisteri, tanymal estrada juldyzdary óner kórsetedi. Munan bólek, «Naýryzbektiń oqiǵasy» interaktivtik ertegisi kórsetiledi. Erteginiń siýjetinde qazaq ertegileriniń, tanymal mýltfilmder men komiksterdiń keiipkerleri toǵysyp, qyzyqty oqiǵalarǵa tap bolady. Zamanaýi formattaǵy qoiylym jas búldirshinderdiń ulttyq qundylyqtar men folklorlyq muraǵa qyzyǵýshylyǵyn arttyrýǵa baǵyttalǵan. Qoiylymdy «Astana miýzikl» teatry usynady.
Is-sharaǵa kelgen balalar men qonaqtar úshin «Qazaqstan» ortalyq kontsert zalynyń foiesinde jabdyqtalǵan kiiz úilerde naýryz kóje usynylady. Sonymen qatar kelýshiler «Qazaqfilm» AQ usynǵan «Muzbalaq» jáne «Kúltegin» mýltfilmderin tamashalai alady.
