Foto: ashyq derekkóz
«Qorǵas» shekaramańy yntymaqtastyǵy halyqaralyq ortalyǵy» Jetisý oblysy ákimdiginiń menshigine ótti. Premer-Ministr Álihan Smaiylov tiisti Úkimet qaýlysyna qol qoidy, dep habarlaidy QazAqparat.
«Memlekettik zańdy tulǵalarǵa bekitilip berilgen memlekettik múlikti memlekettik menshiktiń bir túrinen ekinshisine berý qaǵidasyn bekitý týraly» QR Úkimetiniń 2011 jylǵy 1 maýsymdaǵy № 616 qaýlysyna sáikes QR Úkimeti qaýly etedi:
«Qorǵas» shekaramańy yntymaqtastyǵy halyqaralyq ortalyǵy» arnaiy ekonomikalyq aimaǵyn basqarýshy kompaniiasy» aktsionerlik qoǵamy aktsiialarynyń 100 paiyz mólsherindegi memlekettik paketi QR zańnamasynda belgilengen tártippen respýblikalyq menshikten Jetisý oblysy ákimdiginiń kommýnaldyq menshigine berilsin», - delingen Úkimet qaýlysynda.
Aita keteiik, buǵan deiin atalǵan halyqaralyq ortalyq respýblikalyq menshikte boldy jáne ony basqarý men jumysyn úilestirý Almaty oblysy ákimdiginiń quzyretinde bolǵan edi.
Qosa keteiik, 3 jyldan beri toqtap turǵan «Qorǵas» ortalyǵy biyl 24 sáýirden bastap qaita iske qosyldy.
