QR Qorǵanys ministrligi Kadr departamentiniń burynǵy bastyǵy general-maior Qairat Kópbaev para alǵany úshin sottaldy, dep habarlaidy "Ult aqparat".
Sybailas jemqorlyqqa qarsy is-qimyl agenttiginiń Telegram-akkaýntynda jariialanǵan aqparatqa sáikes, general-maiorǵa qatysty qylmystyq isti tergeý aiaqtaldy.
«2019 jyldyń mamyr aiynda Kópbaevtyń Aqtóbe qalasyndaǵy «T.Bigeldinov atyndaǵy Áýe qorǵanysy kúshteriniń Áskeri institýty» RMM-ǵa ofitserlik laýazymǵa taǵaiyndaǵany úshin 200 myń teńge somasynda para alǵany anyqtaldy. Aqmola garnizony Áskeri sotynyń úkimimen Kópbaev memlekettik qyzmette ómir boiyna laýazym atqarý quqyǵynan jáne 5 jylǵa bas bostandyǵynan aiyryldy», - delingen vedomstvo málimetinde.
Sonymen birge, sot Qazaqstan Respýblikasy Prezidentiniń atyna Kópbaevty general-maior áskeri ataǵynan jáne «Qurmet» ordeninen aiyrý týraly usynys engizgen.
Qorǵanys ministrliginiń general-maiory para aldy degen kúdikpen ustalǵanyn Sybailas jemqorlyqqa qarsy is-qimyl agenttigi osy jyldyń 4 aqpanynda jariialaǵan edi.
Keiinnen oǵan qatysty 2 ai merzimge úiqamaqta ustaý bultartpaý sharasy qoldanylǵan bolatyn.
