Biyl Qorǵanys ministrligi salasynda jasalǵan sybailas jemqorlyq qylmystardyń sany artqan. Bul týraly Antikor News jobasynyń tikelei efirinde aityldy, dep habarlaidy "Ult aqparat".
«Aǵymdaǵy jyly Qorǵanys ministrligi salasynda jasalǵan sybailas jemqorlyq qylmystardyń sany artqanyn atap ótken jón. Osy jyldyń 7 aiynda 2019 jyldyń osy kezeńimen salystyrǵanda qylmystyq isterdiń sany 11-den 31-ge deiin úsh esege artty. Onyń ishinde: 22-si (2019 j. 7 aida - 9 is) sotqa jiberilip, Qorǵanys ministrliginiń 7 laýazymdy tulǵasy sottaldy.», - deidi Agenttiktiń apparat basshysy Qýanysh Japaqov.
Ol ótken aptada QR Qorǵanys ministrliginiń kadr qyzmetinde júieli sybailas jemqorlyq faktileri anyqtalǵanyn aitty.
«Almaty qalasy boiynsha Sybailas jemqorlyqqa qarsy qyzmet Almaty qalasy Qorǵanys departamentiniń bólim bastyǵy men Almaty qalasy Politsiia departamentiniń inspektoryna qatysty sotqa deiingi tergeýdi bastady. Olar adamdar tobymen aldyn ala sóz bailasý arqyly áskeri qyzmetke jaramsyz retinde áskeri bilet berýge járdem kórsetý syltaýymen áskerge shaqyrylýshydan 1 myń AQSh dollaryn quraityn aqshalai qarajatty aldap alǵan. Jasyryn tergeý áreketterin júrgizý barysynda bólim bastyǵy issaparǵa jiberilgen inspektor arqyly 1000 AQSh dollary somasyndaǵy aqsha qarajatyn alý faktisi qujattaldy. Kúdiktilerge qatysty protsessýaldyq ustaý sharasy kinásin tolyq moiyndaýǵa bailanysty qoldanylǵan joq», - deidi ol.
Eske sala ketsek, búgin Antikor News jobasynyń tikelei efirinde QR Prezidentiniń Qazaqstan halqyna Joldaýynda aitylǵan sybailas jemqorlyqqa qarsy reformalardy iske asyrý týraly aityldy.
