بيىل قورعانىس مينيسترلٸگٸ سالاسىندا جاسالعان سىبايلاس جەمقورلىق قىلمىستاردىڭ سانى ارتقان. بۇل تۋرالى Antikor News جوباسىنىڭ تٸكەلەي ەفيرٸندە ايتىلدى, دەپ حابارلايدى "ۇلت اقپارات".
«اعىمداعى جىلى قورعانىس مينيسترلٸگٸ سالاسىندا جاسالعان سىبايلاس جەمقورلىق قىلمىستاردىڭ سانى ارتقانىن اتاپ ٶتكەن جٶن. وسى جىلدىڭ 7 ايىندا 2019 جىلدىڭ وسى كەزەڭٸمەن سالىستىرعاندا قىلمىستىق ٸستەردٸڭ سانى 11-دەن 31-گە دەيٸن ٷش ەسەگە ارتتى. ونىڭ ٸشٸندە: 22-سٸ (2019 ج. 7 ايدا - 9 ٸس) سوتقا جٸبەرٸلٸپ, قورعانىس مينيسترلٸگٸنٸڭ 7 لاۋازىمدى تۇلعاسى سوتتالدى.», - دەيدٸ اگەنتتٸكتٸڭ اپپارات باسشىسى قۋانىش جاپاقوۆ.
ول ٶتكەن اپتادا قر قورعانىس مينيسترلٸگٸنٸڭ كادر قىزمەتٸندە جٷيەلٸ سىبايلاس جەمقورلىق فاكتٸلەرٸ انىقتالعانىن ايتتى.
«الماتى قالاسى بويىنشا سىبايلاس جەمقورلىققا قارسى قىزمەت الماتى قالاسى قورعانىس دەپارتامەنتٸنٸڭ بٶلٸم باستىعى مەن الماتى قالاسى پوليتسييا دەپارتامەنتٸنٸڭ ينسپەكتورىنا قاتىستى سوتقا دەيٸنگٸ تەرگەۋدٸ باستادى. ولار ادامدار توبىمەن الدىن الا سٶز بايلاسۋ ارقىلى ەسكەري قىزمەتكە جارامسىز رەتٸندە ەسكەري بيلەت بەرۋگە جەردەم كٶرسەتۋ سىلتاۋىمەن ەسكەرگە شاقىرىلۋشىدان 1 مىڭ اقش دوللارىن قۇرايتىن اقشالاي قاراجاتتى الداپ العان. جاسىرىن تەرگەۋ ەرەكەتتەرٸن جٷرگٸزۋ بارىسىندا بٶلٸم باستىعى ٸسساپارعا جٸبەرٸلگەن ينسپەكتور ارقىلى 1000 اقش دوللارى سوماسىنداعى اقشا قاراجاتىن الۋ فاكتٸسٸ قۇجاتتالدى. كٷدٸكتٸلەرگە قاتىستى پروتسەسسۋالدىق ۇستاۋ شاراسى كٸنەسٸن تولىق مويىنداۋعا بايلانىستى قولدانىلعان جوق», - دەيدٸ ول.
ەسكە سالا كەتسەك, بٷگٸن Antikor News جوباسىنىڭ تٸكەلەي ەفيرٸندە قر پرەزيدەنتٸنٸڭ قازاقستان حالقىنا جولداۋىندا ايتىلعان سىبايلاس جەمقورلىققا قارسى رەفورمالاردى ٸسكە اسىرۋ تۋرالى ايتىلدى.
